MAPUTO, Mozambique—Go na ga dipula tše maatla tšeo di thomilego ka December go fihla bogareng bja January profenseng ya Zambezia Mozambique, go bakile mafula ao a bolailego batho ba 158. Ofisi ya lekala ya Dihlatse tša Jehofa ya Mozambique e begile gore ga go Hlatse ya Jehofa yeo e gobetšego goba yeo e hlokofetšego. Lega go le bjalo, mafula a a sentše mafelo a mabedi a borapedi a Dihlatse (Diholo tša Mmušo) gotee le magae a tšona a 225.

Dihlatse di ile tša rulaganya dikomiti tša tlhakodišo tše mmalwa go thuša ditho tša tšona mafelong ao a kgomilwego ke mafula. Dihlatse di ile tša diriša Diholo tša Mmušo e le mafelo a nakwana a bodulo le a go fa batho dijo. Motseng wa Chire, wo o lego bokgole bja dikhilomithara tše ka bago 1 500 go tloga Maputo, mafula a ile a senya maporogo ao batho ba a dirišago go tsena motseng, ka gona se se ile sa dira gore Dihlatse tše 1 300 di ikhwetše di le nyanyeng. Mokgatlo wa Difofane wa Mozambique o ile wa dumelela Dihlatse gore di iše ditone tše 17 tša ditlabakelo tša tlhakodišo ka helicopter motseng wo.

Mmoleledi wa Dihlatse tša Jehofa Mozambique, e lego Alberto Libombo, o re: “Ruri go a thabiša go bona ditho tša rena tša mo nageng di dira maiteko a magolo a go šoma le rena modirong wa tlhakodišo. Ofisi ya lekala la Mozambique e sa tšwela pele e rulaganya gore Dihlatse tše di kgomilwego ke kotsi di išetšwe dijo le gore di tle di lokišetšwe le go agelwa magae. Re tla tšwela pele re dira sohle seo re ka se kgonago go kgothatša bahlaselwa ka Beibele le go ba thuša.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Mozambique: Alberto Libombo, mogala +258 21 450 500