Bošegogare bja Mošupologo wa di-14 tša November 2016, tšhišinyego ya lefase yeo e ilego ya lekanywa gwa hwetšwa e le ya bogolo bja 7,8 e ile ya hlasela sehlakahlaka sa New Zealand seo se bitšwago South Island. Dipego tša ka morago ga tiragalo ye di bontšha gore batho ba babedi ba hlokofetše tšhišinyegong yeo. Ka morago ga moo, go bile le ditšhišinyego tše dingwe tše dintši, go akaretša tša bogolo bja 6,0 goba go feta moo, gomme tša wiša meago, tša kgaola mohlagase gotee le go senya ditsela, diporo, tshepedišo ya meetse le diphaephe tša go sepediša ditšhila.

Ka morago ga tšhišinyego ye, ofisi ya lekala ya Dihlatse tša Jehofa kua Australia le bagolo ba New Zealand ba begile gore ga go na Dihlatse tšeo di gobetšego goba go hlokofala tšhišinyegong yeo. Dihlatse di ile tša rulaganya komiti ya tlhakodišo toropong yeo e bitšwago Christchurch, yeo e lego dikhilomithara tše e ka bago tše 91 ka borwabodikela bja moo go bilego le tšhišinyego. Le ge magae a Dihlatse le mafelo a tšona a borapedi di be di se tša senyega kudu, komiti ya tlhakodišo e thuša bao ba wetšwego ke kotsi ka go ba kgothatša ba diriša Beibele, go ba nea dijo le dinyakwa tše dingwe tša bohlokwa.

Sehlopha se Bušago sa Dihlatse tša Jehofa, seo se šomelago ntlongkgolo ya rena kua New York, se dula se nyaka go kwa gore maemo a bjang moo. Ge go nyakega, se tla nea komiti ya tlhakodišo tumelelo ya go diriša meneelo ya modiro wa lefase ka moka.

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, 1-718-560-5000

Australia le New Zealand: Rodney Spinks, 61-2-9829-5600