KUA motseng wa Bratislava, Slovakia, Dihlatse tša Jehofa di ile tša laletša baagišani ba tšona go tlo bona diofisi tša lekala ka December 15, 2012, e le go keteka go fela ga nywaga e lekgolo di ruta ka Beibele nageng yeo. Go ile gwa laletšwa batho bao ba dulago kgauswi le toropo yeo. Batho ba fetago ba 200 ba bile gona gomme go be go beilwe diswantšho tše lesome tša go bontšha dilo tšeo di fihleletšwego historing ya Dihlatse tša Slovakia.

Ka 1912, baemedi ba Dihlatse tša Jehofa ba ile ba thoma modiro wa bona wa go ruta ka Beibele phatlalatša kua Slovakia. Ka 1991, Dihlatse di ile tša lokolla Beibele ya Seslovakia, e lego Beibele e nepagetšego le e balegago gabonolo. Ofisi ya lekala kua Bratislava e hlokometše modiro wa dihlopha tše hlano tša bofetoledi kua Slovakia. Modiro wo o akaretša go fetolela ka Polelo ya Diatla ya Slovakia le Seromania sa ka Bohlabela bja Slovakia gotee le Seromania sa Olah. Dikgatišo ka moka le Dibeibele tšeo di tšweletšwago ke Dihlatse di newa batho mahala. Lehono, Dihlatse tše di fetago tše 11 000 tša kua Slovakia di swara dithuto tša mahala tša Beibele tše di fetago tše 3 400 beke le beke, go thuša batho ba nywaga ya go se swane gore ba thabe gotee le malapa a bona.

Go swarwa diboka tša go ruta ka Beibele diphuthegong tše di fetago tše 160 nageng yeo gomme batho ka moka ba a amogelwa gore ba ka ba gona dithutong tše tša mahala tša Beibele. E bile ke kgale Dihlatse di swara dikopano ngwaga le ngwaga, ya mathomo e swerwe ka 1923. Ka 2006, Dihlatse tša Jehofa di ile tša ba le kopano e kgethegilego kua Bratislava moo go bilego le batho ba 10 700, go akaretša ba fetago ba 3 600 bao ba tšwago Czech Republic, Hungary le Romania.

Rastislav Eliaš, mmoleledi wa Dihlatse tša Jehofa kua Slovakia o re: “Nywageng e 100 e fetilego, Dihlatse tša Jehofa di itiretše leina le lebotse mo Slovakia ka go ba batho ba khutšo le badudi ba botegago bao ba dirišanago gabotse le ba leloko le baagišani. Re tla tšwela pele re šoma ka thata go thuša baagišani ba rena go holwa ke thuto ya Beibele, go etša ge re katanela gore e hole rena.”

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Boditšhaba, mogala +1 718 560 5000

Slovakia: Rastislav Eliaš, mogala +421 2 49107611