SEOUL, Korea—Go ya ka nyakišišo ya Gallup yeo e dirilwego morago bjale, Makorea a mantši a thabela gore mmušo o dumelela bao ba ganago go dira mediro ya bošole ka baka la letswalo go dira mediro e mengwe. Go tloga ka November 4-7, 2013, banna le basadi ba Makorea ba 1 211 ba ile ba kgatha tema nyakišišong yeo e utolotšego gore diperesente tše 68 tša bona bao ba bone go le kaone go nea bao ba ganago go tsenela bošole ka baka la letswalo mediro e mengwe yeo e sego ya bošole go e na le go ba golega. Dinyakišišo tše di bontšha gore go na le phetogo e kgolo tseleng yeo batho ka kakaretšo ba naganago ka yona, ka ge nyakišišo e swanago yeo e dirilwego ka 2008 e bontšhitše gore ke feela diperesente tše 29 tša batho bao ba thabelago gore batho ba newe mediro yeo e sego ya bošole.

Go bonagala batho ba bangwe bao ba šomago ka ditaba tša molao kua Korea le bona ba bona go le kaone gore batho ba dire mediro yeo e sego ya bošole go e na le go golega bao ba ganago go tsenela bošole ka baka la letswalo. Pegong ya gagwe e rego: “Bothata bjo bo Akaretšago Bao ba Ganago go Dira Mediro ya Bošole ka Baka la Letswalo,” Han In-seop, e lego moprofesara Yunibesithing ya Seoul, e lego Sekolo sa tša Molao, o itše: “Le ka mohla ga go na moahlodi yoo a bego a ka latofatša bao ba ganago go tsenela mediro ya bošole ka molato wa boitshwaro goba go baka mpherefere setšhabeng. Ga go nyakege gore bao ba ganago go dira mediro yeo ba golegwe ka ge ba ka se tšhabe. Baahlodi ba be ba sa thabe ge nako le nako ba bona molato bao ba ganago go dira mediro yeo ka baka la letswalo.”

Taba ye ya ditokelo tša batho e ile ya gatelelwa filiming yeo e sa tšwago go tšweletšwa ke Khomišene ya Korea ya Ditshwanelo tša Batho. Filimi ye e akaretša karolo yeo e bitšwago “Ice River,” yeo go yona go tšweletšwago Hlatse ya Jehofa yeo e ilego ya gana go tsenela bošole. Molaodi wa filimi ye o boletše gore o ile a dira phetho ya go tšweletša filimi ye ka morago ga go kwa gore ngwaga le ngwaga go golegwa Dihlatse tše makgolo ka ge di gana go tsenela bošole ka baka la letswalo. Go ya ka pego yeo e dirilwego ke Mokgatlo wa Ditšhaba tše Kopanego wa Ditshwanelo tša Batho yeo e gatišitšwego ka June 2013, diperesente tše 93 tša Dihlatse tšeo di golegilwego lefaseng ka bophara ka ge di gana go tsenela bošole ka baka la letswalo di golegilwe Korea Borwa.

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala. +1 718 560 5000

Repabliki ya Korea: Dae-il Hong, mogala. +82 31 690 0055