DAR ES SALAAM, Tanzania—Kgoro ya Boipelaetšo ya Tanzania, e lego kgorokgolo ya tsheko nageng yeo, e ile ya dumelelana ka go dira phetho ka July 12, 2013 gore dikolo tša tikologong ya Mbeya di gataketše tokologo ya bodumedi ya barutwana ba 127, bao ba ilego ba rakwa sekolong goba go otlwa ka baka la go gana go opela koša ya setšhaba ka baka la matswalo a bona.

Ka 2007, Lekgotla la Taolo ya Sekolo la Shikula le ile la raka bafsa ba Dihlatse ba bahlano ka ge ba ile ba gana go opela koša ya setšhaba. Go oketša moo, dikolo tša tlase le tše phagamego tikologong yeo di ile tša otla bafsa ba bangwe ba Dihlatse ba 122 ka lebaka le le swanago. Ka morago ga ge maiteko a bona a go ipelaetša go balaodi ba tša thuto le tonakgolo a foloditše, barutwana bao ba 127 ba ile ba nyaka thušo ya tša molao go Kgorokgolo ya Tsheko ya Tanzania, kgoro e lego boemong bja bobedi ka bogolo nageng yeo. Kgorokgolo e ile ya thekga go rakwa ga barutwana ba, le ge phetho yeo e be e sa dumelwe ke bohle. Ge nako e dutše e eya, ka December 2, 2010, barutwana bao ba ile ba ngwalela Kgoro ya Boipelaetšo. Go ya le ka dipego tša kgoro tsheko, phetho ya Kgoro ya Boipiletšo e ile ya “phaela ka thoko” phetho ya Kgorokgolo ya Tsheko gomme ya phumola dikotlo ka moka tša yona.

Zadok Mwaipwisi, e lego mmoleledi wa Dihlatse tša Jehofa kua Tanzania, o re: “Re thabetše phetho ya kgoro le go thekga boemo bja bafsa ba bja go gana go opela koša ya setšhaba ka baka la matswalo a bona. Phenyo ye e bontšha gore Dihlatse tša Jehofa gotee le badudi ka moka ba Tanzania ba na le tokologo ya bodumedi.”

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Boditšhabatšhaba, mogala +1 718 560 5000

Tanzania: Zadok Mwaipwisi, mogala +255 22 2650592