BANGKOK—Balaodi ba mmušo ba kua Thailand ba diriša dikgatišo tša Dihlatse tša Jehofa go ruta batho ba moo kamoo ba ka godišago bana ba bona, kamoo ba ka phemago dintwa ka gae le kamoo ba ka dulago ba phetše gabotse monaganong le mmeleng. Ngwaga wo ke wa boraro balaodi ba mmušo ba Thailand, ba diriša dikgatišo tša Dihlatse tša Jehofa go ruta batho ba nageng ye ka ditaba tše di holago setšhaba.

Lenaneo le la mmušo la go ruta batho ba kua Thailand le direlwa mafelong a fetago a 8 700 nageng yeo. Go oketša moo, mmušo o hlamile mafelo a 11 ao a bitšwago Community Development Learning Centers (CDLC), ao morero wa ona e lego go ruta baetapele ba setšhaba. Chaiwat Saengsri yo a emego gare seswantšhong se se lego ka mo godimo, ke molaodi wa CDLC porofenseng ya Nakhon Nayok yeo e lego ka leboabohlabela bja Bangkok. O boletše gore: “Dihlatse tša Jehofa di nkgahla kudu, morero wa tšona o mogolo ke go thuša batho gore ba tsebe Mmopi. Morero wa rena o a swana, re nyaka go thuša badudi ba nageng ya gabo rena gore ba phele ka khutšo le go phela gakaone.” O okeditše ka gore: “Ka mohlala, makasine wa Phafoga! wo o nago le sehlogo se se rego ‘Kamoo go ka Phengwago Polelo e Gobatšago,’ [o na le] sehlogwana seo Lefapha la Ditaba tša Setšhaba le Tšhireletšego ya Batho le lekago go se ruta baetapele ba setšhaba. Sehlogo se se re thušitše kudu go ba tlwaetša.” Ka morago ga moo, Morena Chaiwat o ile a botša Dihlatse tša Jehofa gore di ka bontšha batho dikgatišo tša tšona sebokeng sa baetapele seo se bitšwago SMART. Sebokeng seo baetapele ba ditikologong tše 100 le bahlahli ba 20 go tšwa diprofenseng tše 28, ba ile ba kopana gore ba rutwe kamoo ba ka bago baetapele ba ba kaone le kamoo ba ka thušago ditšhaba tša gabo bona. Dihlatse tša Jehofa di eme kgauswi le Morena Chaiwat seswantšhong se se lego ka mo godimo.

Anthony Petratyotin yo e lego moemedi wa Dihlatse tša Jehofa kua Thailand o re: “Re thabišwa ke gore baetapele ba setšhaba ba diriša dikeletšo tšeo di lego ka dikgatišong tša rena tšeo di theilwego Beibeleng go thuša batho. Re tla tšwela pele re nea balaodi ba mmušo dikgatišo tša rena, le go diriša mokgwa wa rena o tlwaelegilego wa go di nea batho mafelong ohle.”

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, +1-845-524-3000

Thailand: Anthony Petratyotin, +66-2-375-2200