LVIV, Ukraine—Dihlatse tša Jehofa di tšwela pele go thuša badumedigotee le tšona bao ba hudušitšwego ka baka la ntwa yeo e aparetšego karolo ya ka bohlabela bja Ukraine.

Gare ga Dihlatse tše e ka bago tše 7 500 tšeo di tšhabilego lefelong la ntwa, tše e ka bago tše 4,000 di hlokometšwe ke dikomiti tša tlhakodišo tše šupa tšeo di rulagantšwego ke ofisi ya lekala ya Dihlatse tša Jehofa ya kua Lviv. Tše dingwe tšeo di kgomilwego ke ntwa di išitšwe malapeng a meloko le a badumedigotee le tšona kua Ukraine le Russia. Dikomiti tše dingwe tša tlhakodišo tše tshela di hlokometše Dihlatse tše fetago tše 17 500 tšeo di sa dutšego lefelong la ntwa.

Lekala la Lviv le begile gore Dihlatse tše tshela di šetše di lobile maphelo a tšona mola ntwa e thomago. Hlatse e nngwe kua Kramatorsk e bolailwe ka June 17, 2014, ge pomo e be e thuthupa kgaufsi le koloi yeo e bego e e nametše. Dipomo di bolaile gape le Dihlatse tše dingwe tše hlano tšeo di dulago ditoropong tša Donetsk, Sloviansk, Rozkishne, le Luhansk.

Ka ge e le karolo ya bona ya go thuša, ofisi ya lekala e laola dithulaganyo tša go aga lefsa mafelo a mmalwa a borapedi a Dihlatse gaešita le magae a tšona.

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba ya Ditšhabatšhaba, mogala. +1 718 560 5000

Ukraine: Vasyl Kobel, mogala. +38 032 240 9323