JULY 10, 2015
Ukraine
Dihlatse di Hlaselwa ka Baka la Ditumelo tša Tšona Bohlabela bja Ukraine
Ka ge di be di hlohleletšwa ke lehloyo la bodumedi, dihlopha tša batho tšeo di bego di itlhamile nageng ya Bohlabela bja Ukraine, di ile tša utswa le go goboša Dihlatse tša Jehofa tše 26 ga e sa le go tloga ka August 2014. Dihlatse tše dintši di dula lefelong leo gomme di tsebja kudu ka modiro wa tšona wa go bolela ka Beibele le go se tšee lehlakore dipolotiking. Tše dingwe tša ditho tša dihlopha tšeo di itlhamilego di ile tša diriša gampe tlhakatlhakano yeo e lego gona Ukraine go hlasela Dihlatse. *
Ditiro tša Bošoro
Ka di 21 tša May, 2015, maphodisa a toropo ya Stakhanov a ile a golega banna ba babedi ba Dihlatse ba ka godimo ga mengwaga e 60 ka baka la modiro wa bona wa bodumedi. Ba ile ba latofatšwa ka gore ba šitiša khutšo ya batho le go golegwa matšatši a 15. Ge ba dutše ba le kgolegong, ba ile ba latofatšwa ka gore ba radia mmušo gomme ba ile ba botšološišwa leboelela ka mokgatlo wa Dihlatse tša Jehofa. Ditho tša phuthego di ile tša lopa motšhotšhisi wa lefelong leo gore ba lokollwe eupša o ile a gana kgopelo ya tšona. Mathomong ba leloko le Dihlatsegotee ba be ba sa dumelelwa go bona banna ba ba babedi eupša ka morago ba ile ba dumelelwa go ba nea dijo, diaparo le dihlare gararo ka beke. Monna yo mongwe o ile a lokollwa ka di 2 tša June, 2015, gomme yo mongwe letšatšing le le latelago, ka taelo ya gore ba huduge lefelong leo.
Ka di 17 tša May, 2015, banna bao ba itlhamilego ba toropong ya Novoazovsk ba ile ba swara Dihlatse tša Jehofa tše nne, ba di thiba mahlo, ke moka ba di iša lefelong la mašole ba di šupile ka dithunya. Ka diiri tše pedi, ba ile ba betha Dihlatse tšeo o šoro le go di tšhošetša ka gore ba tla di bolaya. Ba ile ba laela gore yo monyenyane go Dihlatse tše a tsenele bošole le gore Dihlatse tše dingwe di bolele gore bodumedi bja Orthodox ke bjona feela bja therešo. Dihlatse tšeo di ile tša lokollwa ka morago ga gore di fetše bošego ka moka di golegilwe ka nakwana.
Ka di 22 tša January, 2015, banna ba bararo bao ba itlhamilego ba ile ba utswa Hlatse e nngwe mošomong wa yona toropong ya Donetsk. Lapa la gagwe le be le sa tsebe gore o išitšwe kae goba go diregile eng ka yena. Ge a dutše a swerwe, o ile a hlalosa leboelela gore ga a tšee lehlakore dipolotiking ke moka a lokollwa ka morago ga matšatši a senyane.
Ka di 9 tša August, 2014, lešole leo le bego le itlhamile le ile la utswa Dihlatse tše pedi toropong ya Stakhanov, motseng wa Luhansk. Ka ge di be di swerwe ka matšatši a tshela, di ile tša bethwa leboelela le go tšhošetšwa ka gore di tla ripša ditho le go bolawa. Di be di sa newe dijo tše di lekanego, meetse, diaparo le tlhokomelo ya tša kalafo. Bao ba bego ba di swere ba ile ba leka go di gapeletša gore di tlogele tumelo ya tšona, di dumele dithuto tša Orthodox le go khunamela diswantšho, ditiro tše di bontšha gore Dihlatse di hlaselwa ka baka la tumelo ya tšona. Go sa šetšwe go swarwa gampe ka tsela ye, Dihlatse ga se tša ka tša ineela.
Tše ke dikgobalo tša banna ba babedi ba Dihlatse bao ba ilego ba utswiwa le go bethwa toropong ya Novoazovsk
Dihlatse tša Jehofa di phela ka go dumelelana le ditumelo tša tšona e bile di gana go lwa, go ipelaetša goba go thekga mašole ka ditšhelete nageng ya Ukraine. Dihlopha tšeo di itlhamilego di ile tša hlasela Dihlatse ka baka la go se tšee lehlakore dipolotiking le go gana ditumelo tša Orthodox. Ditlhaselo tše bjalo ke tša go leka go di gapeletša gore di tlogele tumelo ya tšona.
Go Kgotlelela go sa Šetšwe Tlaišo
Ka ge naga ye e sa dutše e le ntweng, ga bjale Dihlatse ga di kgone go hwetša thušo go ba molao. Di begile ditlhaselo tšeo mebušong ya dinaga tše dingwe, go akaretša le go Setho se se Kgethegilego sa UN seo se Swaraganago le go Tlaišwa le go Swarwa Gampe ga Batho.
Go sa šetšwe maemo a thata ao Dihlatse tša Jehofa di lebeletšanego le ona Bohlabela bja Ukraine, di ikemišeditše go se tšee lehlakore dipolotiking le go tšwela pele di swara dipokano tša tšona ka šedi. Di holofela gore bao ba eteletšego pele ba tla hlompha tokelo ya tokologo ya bodumedi.
^ ser. 2 Banna bao ba itlhamilego ba ile ba hlasela Yuriy, yo a swantšhitšwego mathomong a sehlogo se ka gobane e le Hlatse ya Jehofa. Ka letšatši le lengwe ba ile ba mo emiša seterateng ge a be a etšwa medirong ya bodumedi gomme matšatšing a mangwe ba ile ba mo hlasela a le legaeng la gagwe. Ba ba be ba mmotša gore o swanetše go tlogela bodumedi bja gagwe le go kgaotša mediro yeo e dirwago ke Dihlatse tša Jehofa.