LVIV, Ukraine—Go sa šetšwe ntwa ya kua bohlabela bja Ukraine, Dihlatse tša Jehofa di be di bokane kua Lviv go tloga ka July 4-6, 2014, Kopanong ya tšona ya Selete ya “Tšwelang Pele le Tsoma Mmušo wa Modimo Pele!” Phetolelo ya Lefase le Lefsa ya Mangwalo a Makgethwa yeo e kaonefaditšwego ya Seukraine seo se tlwaelegilego, e lokolotšwe ke Anthony Morris, e lego setho sa Sehlopha se Bušago sa Dihlatse tša Jehofa.

Ofisi ya lekala ya Dihlatse tša Jehofa ya lefelong leo e ile ya rulaganya gore dintlha tše bohlokwa tša lenaneo la kopano di gašwe ka kgokaganyo ya bidio ditoropong tše 8 le mafelong a mangwe a 62 kua Donetsk, mo ntwa e befilego gona. Palomoka ya bao ba bilego gona go akaretša le mafelo ao a bego a kgokagantšwe ka bidio, e bile 82 832, gomme bao ba bego ba le lepatlelong kua Lviv e bile ba ka godimo ga 18 336. Batho ba 1 068 ba ile ba kolobetšwa.

Letšatšing la pele la kopano, lenaneo le ile la šitišwa ka ge go ile gwa ba le tšhošetšo ya pomo gomme se sa dira gore batho ba hudušwe le semeetseng go tšwa lepatlelong. Batho ba fetago 16 000 ba ile ba tšwa lepatlelong ka metsotso e 11, eupša lenaneo le ile la tšwela pele ka morago ga gore balaodi ba kgonthišetše gore tšhošetšo yeo e be e le ya maaka.

Vasyl Kobel, mmoleledi wa Dihlatse tša Jehofa kua Ukraine o boletše gore: “Re thabetše go ba le baeng ba bantši kopanong ya rena. Karolo e kgahlišago ya kopano ye e bile ge go lokollwa Phetolelo ya Lefase le Lefsa ka Seukraine, ye e lokolotšwego la pele ka Seisemane ka October 2013. Re fagahletše go abelana le baagišani ba rena dikholofetšo tša Beibele tša bokamoso bja khutšo, kudukudu mo nakong ye ya tlalelo historing ya naga ya rena.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Ukraine: Vasyl Kobel, mogala. +38 032 240 9323