Kgorokgolo ya tsheko ya Ukraine e kgonthišeditše gore batho bao ba ganago go tsenela bošole ka baka la letswalo ba na le tokelo ya go dira mediro e mengwe yeo e sego ya bošole gaešita le nakong ya dikgaruru le ntwa. Phetho ye ya kgoro e tloga e thekga ditokelo tša batho nageng ya Ukraine le dinageng tše dingwe.

Vitaliy Shalaiko, yo e lego Hlatse ya Jehofa, o ile a pharwa ka molato wa go gana go ya bošoleng nakong ya ge naga e biletša batho bošoleng e le gore ba itokišeletše ntwa ka ge a be a kgopetše go dira mediro e mengwe yeo e sego ya bošole. Bobedi kgoro ya tsheko ya tlasana le kgorokgolo ya tsheko di ile tša phumola molato wa gagwe, eupša motšhotšhisi o ile a dira boipiletšo Kgorongkgolo ya Tsheko ya Ukraine yeo e šomanago le melato ya bosenyi le melato ya ge batho goba mekgatlo e kgakgana. Ka June 23, 2015, kgorokgolo ya tsheko e ile ya gana boipiletšo bjo ke moka ya ema le phetho yeo e dirilwego ke dikgoro tša tsheko tša tlasana.

Kgorokgolo ya tsheko e kgonthišeditše gore “kgoro ya tsheko ya tlasana e na le mabaka a kwagalago a go latela melao ya Tumelelano ya Yuropa ya Ditokelo tša Batho le diphetho tša Kgoro ya Tsheko ya Ditokelo tša Batho ya Yuropa.” Kgorokgolo ya tsheko e dumelelane le phetho ya kgoro ya tsheko ya tlasana ya gore melawana yeo e dirišitšwego tshekong ya Bayatyan v. Armenia e a šoma le molatong wo. Molato wo o ile wa ahlolwa ke Komitikgolo ya Yuropa ya Ditokelo tša Batho ka July 7, 2011. Kahlolo ye e ile ya thekga tokelo ya bao ba ganago go tsenela bošole ka baka la letswalo ka ge se se sa dumelelane le ditumelo tša bona tša bodumedi tšeo di thekgwago ke Article 9 ya Tumelelano ya Yuropa ya Ditokelo tša Batho. Molatong wa Vitaliy Shalaiko, kgorokgolo ya tsheko ya Ukraine e ile ya bolela ka mo go kwagalago gore ditokelo tša bao ba ganago go tsenela bošole ka baka la letswalo ga se tša swanela go gatakelwa gaešita le nakong ya ge naga e itokišetša ntwa e sego feela ge go nyakwa mašole. Phetho ya kgorokgolo ya tsheko ye ke ya makgaolakgang go ka se sa dirwa boipiletšo bjo bongwe gape.

Phetho ye ya mafelelo e imolotše Mna. Shalaiko dipelaelong tše dintši. O bolela gore: “Ke kwešiša maikemišetšo a mabotse ao naga ya gešo e nago le ona a go šireletša badudi ba yona ka go tlwaeletše mašole ntwa. Ka ge letswalo la ka le sa ntumelele go tsenela bošole, ke tloga ke ikemišeditše go dira mediro e mengwe yeo e sego ya bošole. Ke leboga gore dikgoro tša tsheko di lemogile gore go gana ga ka go tsenela bošole go theilwe ditumelong tša ka tša bodumedi.”

Dihlatse tša Jehofa tše diketekete nageng ya Ukraine ka moka di be di lebeletšane le bothata bja go se tšee karolo dintweng. Dihlatse tšeo di bego di lebane le molato ka ge di ganne go ya ntweng ga bjale di ka holofela gore molao o tla latela seo se diregilego molatong wa Vitaliy Shalaiko.

Ramolao wa Mna. Shalaiko e lego Vadim Karpov o boletše gore: “Ge taba ye e bewa ga bonolo, kgorokgolo ya tsheko e hlalositše gore ka ge Mna. Shalaiko e le Hlatse ya Jehofa a ka se bonwe molato ka baka la go gana go ya bošoleng. Gaešita le naga ya go swana le Ukraine, yeo e arogantšwego ke dintwa le dikgaruru, go bohlokwa gore melao ya ditšhabatšhaba ya mabapi le tokologo ya bodumedi le ya letswalo e dirišwe.”

Dikgoro tša tsheko tša Ukraine di lemoga gore go gana go tsenela bošole ka baka la letswalo ke tokelo ya motheo yeo e swanetšego go hlompšha le nakong ya ge naga e tlwaeletša mašole ntwa. Ga se boithati goba go bea tšhireletšego ya naga kotsing ge e ba motho a gana go ya bošoleng. Ka go dumelelana le dikahlolo tša dikgoro tša tsheko tša tlasana, kgorokgolo ya tsheko e ile ya hlompha ditokelo tša batho ka moka nageng ya Ukraine. Ukraine e beetše dinaga tšeo di otlago bao ba ganago go tsenela bošole ka baka la letswalo mohlala o mobotse.