NOUMEA, New Caledonia—Go thoma bošegong bja March 13, 2015, Ledimo le Matla leo le bitšwago Pam le ile la senya kudu sehlakahlakeng sa Pacific nageng ya Vanuatu. Ofisi ya lekala ya Dihlatse tša Jehofa ya New Caledonia e begile gore ga go Hlatse yeo e gobetšego goba e hlokofetšego nageng ya Vanuatu nakong ya ledimo le le kotsi. Go sa dutše go nyakišišwa gore ledimo le le sentše gakaakang, eupša sehlakahlakeng sa Efate, magae a Dihlatse a 31 a senyegile mola a 58 a senyegile kudu. Sehlakahlakeng sa Tanna, mo e nyakilego go ba magae ka moka a Dihlatse a senyegile o šoro. Diphefo tše di sentše le Diholo tša Mmušo (mafelo a borapedi a Dihlatse tša Jehofa) tše tharo, mola e nngwe e sentšwe ke sehlare seo se e wetšego.

Komiti ya tlhakodišo yeo e lego Port Vila nageng ya Vanuatu, e ile ya thuša ka dijo, meetse le moo malapa a 100 a ka tšwago a dutše gona. Go oketša moo, dilo tša tlhakodišo di ile tša romelwa Dihlatse tša Tanna bakeng sa dinyakwa tša bona. Ofisi ya lekala ya Australia e šoma le ofisi ya lekala ya New Caledonia go thekga modiro wo wa tlhakodišo, woo o akaretšago go aga mafelo a bodulo a nakwana, go lokiša dintlo tšeo di senyegilego, go nea dilo tša go robala, diaparo le dilo tše dingwe.

Jean-Pierre Francine, e lego mmoleledi wa Dihlatse tša Jehofa New Caledonia, o re: “Re leboga kudu kamoo dinaga tše dingwe gaešita le mekgatlo ya mmušo e thušitšego bana babo rena ka gona. Ga bjale difofane tša Vanuatu di thomile go šoma gape, moemedi go tšwa ofising ya lekala ya New Caledonia gotee le bahlankedi bao ba etelago diphuthego tša Jehofa ba tla kgona go etela sehlakahlaka se bakeng sa go nea thušo le go kgothatša Dihlatse tša moo ka Beibele.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

New Caledonia: Jean-Pierre Francine, mogala +687 43 75 00