HARARE, Zimbabwe—Dihlatse tša Jehofa di thomile Dikopano tša Selete tša 2015 tša “Ekiša Jesu!” ka Labohlano la July 31. Dikopano tše tša matšatši a mararo di tla swarwa dibeke tše 12 tša go latelana go ba go fihla bogareng bja October.

John Hunguka e lego mmoleledi wa Dihlatse tša Jehofa nageng ya Zimbabwe o re: “Re tloga re fagahletše dikopano tše, kudukudu ka morago ga go atlega ga kopano ya ditšhabatšhaba ya ngwaga wa go feta yeo e bego e le toropong ya Harare, yeo e bilego tiragalo e kgolo historing ya Dihlatse tša Jehofa nageng ye.” Kuranta ya NewsDay, e lego kuranta yeo e balwago kudu Zimbabwe, e begile gore kopano ya ditšhabatšhaba e bile “seboka se segolo sa bodumedi seo se kilego sa ba gona” nageng ye, le go bolela gore ka 2014 “naga ka moka e be e sa fetše go bolela ka Dihlatse.”

Batho ba fetago 82 000 ba ile ba tlatša lefelo la dipapadi la National Sports Stadium toropong ya Harare letšatšing la mafelelo la kopano ye ya 2014. Ka morago ga kopano ye moemedi wa ofisi ya lekala la Dihlatse ya Zimbabwe e lego John Jubber, o boletše gore: “Re be re e na le baeng ba 3 500 bao ba tšwago Brazil, Jeremane, United States, Zambia le Kenya.”

Kopano ye e ile ya ba le dipoelo tše dibotse kudu moo Walter Mzembi, e lego Tonakgolo ya Tourism and Hospitality Industry nageng ya Zimbabwe, yoo ka go kgethega a ilego a etela ntlokgolo ya Dihlatse ya New York go leboga ge go kgethilwe naga ya gabo gore e be le kopano ya ditšhabatšhaba. Bidiong yeo Dihlatse di bego di boledišana le Mna. Mzembi o itše: “Molaetša wo ke nago le wona go tšwa bathong ka moka ba Zimbabwe ke gore, ‘O ka re re ka ba le dikopano tša ditšhabatšhaba tša Dihlatse tša Jehofa beke e nngwe le e nngwe’ . . . Mopresitente wa naga ya gešo o leboga go menagane gomme o rata ge Dihlatse di ka boa gape go tšwetša pele modiro wa bodumedi bja tšona nageng ye.”

Ngwageng wo, Dihlatse nageng ya Zimbabwe di tla swara Dikopano tša Selete tše 39 tša “Ekiša Jesu!” mafelong a fapafapanego, go akaretša le Zimbabwe International Trade Fair Grounds. Lenaneo la kopano ka moka goba karolo ya lona le tla swarwa ka se-China sa (Mandarin), se-Chitonga sa (Zimbabwe), Seisemane, Sendebele sa (Zimbabwe), Seshona, Seswahili le Polelo ya Diatla ya Zimbabwe. Matšatši le mafelo a dikopano tša Zimbabwe a hwetšwa Wepesaeteng ya semmušo ya Dihlatse ya jw.org.

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Zimbabwe: John Hunguka, mogala +263 4 2910591