Ehab Samir yo a nago le mengwaga e 52 ke modudi wa Egipita e bile ke yo mongwe wa Dihlatse tša Jehofa. Morena Samir o re ka ge mmušo wa Egipita o thibetše Dihlatse tša Jehofa go dira mediro ya tšona ya bodumedi ka bolokologi, tše dintši tša tšona di ile tša swarwa “bjalo ka ge eka ke disenyi.” Ka gona o ile a kgothatšwa ke go bala sehlogo seo se tšweletšego Inthaneteng seo se bego se hlalosa ditaba ka mokgwa wo di lego ka gona.

Sehlogo seo se rego, “Dr. Riham Atef o Ngwala Mabapi le Dihlatse tša Jehofa” se ile sa tšweletšwa wepesaeteng ya ditaba ya Egipita yeo e bitšwago Shbab Misr ka di-19 tša August 2016. Dr. Atef, yo e lego mothuši wa moprofesara Yunibesithing ya Cairo le mmegi wa ditaba o ile a ngwala mabapi le go se kwešišwe ga Dihlatse tša Jehofa nageng ya Egipita. O tlwaelane le ba bangwe ba Dihlatse tša Jehofa, gomme ka morago ga gore a dire nyakišišo e tseneletšego ka tšona, o itše: “Ke kgodišegile gore di botho e bile di hlompha ditumelo tša batho ba bangwe.”

Dr. Atef o boletše gore sehlogo seo o be a se ngwalela “batho bao ba sa tsebego selo ka Dihlatse tša Jehofa le bao ba di hloilego ka ge ba kwele maaka ao a bolelwago ka tšona.” Sehlogong seo o ile a bolela ganyenyane ka tše dingwe tša ditumelo tša motheo tša Dihlatse tša Jehofa gomme a hlalosa gore “go na le ditaba tše dingwe tše dintši wepesaeteng ya tšona ya www.pr418.com.”

Ka morago ga gore Dr. Atef a dire nyakišišo ka Dihlatse tša Jehofa o ile a bona phapano e kgolo magareng ga seo a se bonego le tsela yeo Dihlatse di tsebjago ka yona Egipita. O itše: “Ga ke kwešiše gore ke ka baka la eng mediro ya tšona e thibetšwe. Ga di tsenatsene dipolotiking. . . . Di kgothaletša batho go ratana le go ba le khutšo.” Dr. Atef o ile a botšiša gore: “Na a ke mabaka a gore di thibelwe? Goba na di thibetšwe ka gobane dithuto tša tšona tšeo di theilwego Beibeleng ga di swane le tša dikereke tše dingwe?”

Morena Samir o ile a thabela kudu go bala sehlogo seo sa mabapi le Dihlatse moo a ilego a ikwa a tutueletšega go ngwalela motšweletši lengwalo gore a mo leboge. O itše: “Ke badile dihlogo tše dintšinyana Inthaneteng [Egipita] mabapi le Dihlatse tša Jehofa, eupša ke tše sego kae feela tšeo di bolelago gabotse ka tšona. Ka gona ke hlompha Dr. Riham Atef ka ge a na le sebete e bile a bolela nnete.” Wepesaete yeo ya ditaba e ile ya ntšha lengwalo la Morena Samir ka di-11 tša December 2016.

Lengwalong leo la gagwe, Morena Samir o ile a hlalosa kamoo a nyamišitšwego ke tsela ya go hloka toka yeo Dihlatse di swarwago ka yona gomme a bolela gore tše ka moka di direga ka baka la maaka ao a bolelwago ke baruti ba dikereke. Morena Samir o hlalositše gore ditori tšeo tša go senya Dihlatse leina ke tšona di dirilego gore a tlaišwe. Ke moka o ile a re: “Tsela e kaone ya go tseba motho ke go boledišana le yena. Ka gona ke nyaka go leboga Dr. Riham Atef ka seo a se ngwadilego.”

Morena Samir o ile a phetha lengwalo la gagwe ka mantšu a ao a tšwago pelong: “Ke fela pelo ya go bona go thibelwa ga modiro wa Dihlatse tša Jehofa ka tsela ya go hloka toka go fedišitšwe e le gore re kgone go hlankela Modimo re lokologile nageng ye ya gabo rena.”

Mengwageng e masome e fetilego, Dihlatse tša Jehofa di kile tša ba le tokologo ya bodumedi Egipita gomme di be di ngwadišitšwe semolao. Lega go le bjalo, ka 1960 di ile tša amogwa tokelo yeo ya go ngwadišwa semolao gomme tša se dumelelwe go hwetša ditokelo tše dingwe tše dintši tša bodumedi le tša batho tšeo di bego di hwetšwa ke madumedi a mangwe a Bokriste kua Egipita.

Ga e sa le go tloga ka yona nako yeo, Dihlatse tša Jehofa di ile tša tšwela pele di bontšha gore di thekga setšhaba, gomme bjalo ka ge Dr. Atef a boletše, “di kgothaletša batho go ratana le go ba le khutšo” maemong ka moka. Ka go swana le Morena Samir, batho ba bangwe ba bantši ba kganyoga go bona Dihlatse di neilwe ditokelo tša tšona tša motheo gomme di thabela tokologo ya bodumedi Egipita.