HELSINKI—Ka Labohlano la di-18 tša August 2017 thapama, yo mongwe wa dikgaetšedi tša rena tša Finland o bolailwe kotsing yeo go solwago gore e ka ba e le ya batšhošetši bao ba hlaselago basadi. Go oketša tiragalong yeo, disenyi di bolaile mosadi o mongwe gomme tša gobatša batho ba seswai tlhaselong yeo e diragetšego mmarakeng wa toropong ya Turku, yeo e lego ka borwabodikela bja Finland. Kapejana ka morago ga tlhaselo yeo, baemedi ba ofisi ya lekala la Finland, molebeledi wa tikologo wa moo le bagolo, ba ile ba yo kgothatša le go thekga batho bao ba amegilego tiragalong yeo.

Veikko Leinonen, e lego moemedi wa ofisi ya lekala la Finland o itše: “Tiragalo ye e kweša bohloko e bile e a tšhoša. Re nyamišitšwe kudu ke gore tiragalong yeo, yo mongwe wa babulamadibogo ba rena yo re mo ratago o bolailwe ge a be a ruta batho Beibele a diriša teroli mafelong a batho bohle. Re a tseba gore go sa šetšwe mekgwa ka moka yeo re itšhireletšago ka yona, ga se ka mehla re ka kgonago go thibela dilo tšeo di tlago re sa di letela, go akaretša dintwa le botšhošetši. Lega go le bjalo, re tšwela pele re kgothatšana, kudukudu lapa labo kgaetšedi yoo a bolailwego. Re rapela Jehofa gore a nee bao ba hwetšwego ke batho bao ba ba ratago tlhaselong ye khutšo ya monagano. Le gona, re tla tšwela pele ka go tšea megato ya go itšhireletša e bile re ka se dumelele dilo tšeo di diregilego di re šitiša go tšwela pele ka modiro wa rena wa go bolela ditaba tše dibotse.”—Mmoledi 9:11; Baroma 15:13; Bafilipi 4:6, 7.

Ofisi ya lekala e ile ya romela diphuthego ka moka tša Finland mangwalo go di nea kgothatšo e tšwago ka Beibeleng. Le gona e ile ya rulaganya gore go be le seboka se se kgethegilego sa go tlo kgothatša Dihlatse tša Jehofa tše 135 tšeo di felago di ruta batho Beibele di diriša diteroli toropong ya Turku. Babulamadibogo bao ba ile ba bontšha gore ba na le sebete e bile ba ikemišeditše go tšwela pele ba ruta batho Beibele moo.

Batho bao ba dulago toropong ya Turku ba tshwenyegile kudu ka taba ya gore tlhaselo yeo e diregile nageng ya Finland, e lego naga yeo e tumilego ka go ba e nngwe ya dinaga tše di šireletšegilego lefaseng. Letšatši la ka morago ga tlhaselo yeo, ge bana babo rena ba be ba ruta batho Beibele mmarakeng le ka ntlo le ntlo, ba be ba theetša ka kelohloko bao ba bolelago le bona le go ba kgothatša ka mangwalo.

Ofisi ya lekala ya Finland e leboga bana babo rena go tšwa lefaseng ka moka ka thekgo yeo ba e bontšhitšego ka go ngwala melaetša le go rapelela bana babo bona. (1 Petro 2:17; 5:9) Sa bohlokwa le go feta, ka moka ga rena re leboga Jehofa, “Modimo yo a fago kgotlelelo le khomotšo.”—Baroma 15:5.

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, +1-845-524-3000

Finland: Veikko Leinonen, +358-400-453-020