NEW YORK—Dihlatse tša Jehofa di tla thoma dikopano tša tšona tša selete tša ngwaga le ngwaga ka Labohlano la di-18 tša May, 2018. Sehlogo sa kopano ya ngwaga wo se re “Eba le Sebete!” Pele ga ge dikopano di ka thoma, Dihlatse tša Jehofa lefaseng ka moka di tla laletša batho ka moka go tla kopanong. Dikopanong tšeo go tsenwa mahala. Dikopano tše di tla swarelwa mafelong a 180 dinageng tša go fapafapana.

Lenaneo la kopano ye ya matšatši a mararo, le na le dikarolo tše 54 tšeo di akaretšago dipolelo, diterama tša go theetšwa, dipoledišano le dibidio tše dikopana. Go oketša moo, letšatšing la mafelelo la kopano go tlo bogelwa filimi yeo e nago le sehlogo se se rego, Kanegelo ya Jona—Anke e go Rute go ba le Sebete le Kgaugelo. Lenaneo le lengwe le lengwe la mesong le la thapama le tlo thoma ka dibidio tša mmino tšeo re di lokišeleditšwego.

David A. Semonian, e lego mmoleledi wa Dihlatse tša Jehofa o re: “Matšatši a, ge o bogela ditaba, o tla no bona gore batho ka moka go akaretša le bana ba na le mathata a mantši e bile ba dula ba tšhogile go feta le ge e le neng pele. Go nyakega sebete gore re lebeletšane le maemo a. Re laletša batho ka moka go tla kopanong ya selete ya ngwaga wo go tlo kwa kamoo keletšo ya Beibele e ka ba thušago go ba le sebete.”

O ka hwetša dinako le mafelo a dikopano tša selete wepesaeteng ya semmušo ya Dihlatse tša Jehofa ya jw.org/nso

Ba Ditaba:

David A. Semonian, Ofisi ya Ditaba tša Setšhaba, +1-845-524-3000