Go sa šetšwe gore bolwetši bja coronavirus bo sa dutše bo le gona, Dihlatse tša Jehofa di tšwela pele go lokolla Dibeibele ka maleme a mafsa. Ka di-28 tša June 2020, Phetolelo ya Lefase le Lefsa ya Mangwalo a Makgethwa e lokolotšwe ka maleme a mane: Seswati, Setsonga, se-Zulu le Sechitonga. Le gona Phetolelo ya Lefase le Lefsa ya Mangwalo a Bokriste a Segerika e lokolotšwe ka Sebelize Kriol le Setotonac. Le ge bana babo rena ba be ba ka se kgone go ba mmogo ka baka la bolwetši bja coronavirus, ba ile ba thabela go hwetša Dibeibele tše mo didirišweng tša bona tša elektroniki. Bana babo rena ba be ba bogetše ka bidio ge Dibeibele tše di lokollwa dipolelong tšeo di rekhotilwego e sa le pele.

Ngwanabo rena Geoffrey Jackson, wa Sehlopha se Bušago, o lokolotše Phetolelo ya Lefase le Lefsa ya Mangwalo a Makgethwa ka Seswati le Phetolelo ya Lefase le Lefsa ya Mangwalo a Makgethwa yeo e kaonefaditšwego ka Setsonga le se-Zulu. Ka moka di hwetšagala didirišweng tša elektroniki (bona seswantšho sa mathomo). Bagoeledi ba Afrika Borwa le Eswatini ba bogetše seboka se se se kgethegilego ka bidio.

Tšhemong ya lekala la Afrika Borwa, batho ba e ka bago ba 18.5 milione ba bolela Seswati, Setsonga le se-Zulu. Palo ye e akaretša le bagoeledi ba ka godimo ga 38 000.

Ngwanabo rena Augustine Semo, wa Komiti ya Lekala la Malawi, o lokolotše Phetolelo ya Lefase le Lefsa ya Mangwalo a Makgethwa ka Sechitonga sa Malawi.

Go tšere sehlopha sa bafetoledi mengwaga ya ka godimo ga e mebedi gore ba fetše go fetolela Beibele e mpsha ya Sechitonga. Yo mongwe wa bafetoledi bao o rile: “Polelo ya Sechitonga e na le mebotwana e meraro. Batho ba lefelong le itšego ba šomiša mantšu ao batho ba lefelong le lengwe ba sa a tsebego. Ka gona, re ile ra kgetha mantšu ao a bego a tla kwešišwa ke batho ba bantši. Gape re ile ra šomiša mengwalo ya ka tlase go hlalosa mantšu ao mmadi a ka bago a sa a tsebe.”

Yo mongwe yena a re: “Go tlo ba bonolo gore bagoeledi ba šomiše Beibele ye tšhemong goba dibokeng ka gore e šomiša polelo e bonolo le ya go kwagala. Se se dira gore go be bonolo go e bala le go e kwešiša.”

Ngwanabo rena Joshua Killgore wa Komiti ya Lekala la Amerika ya Bogareng, o lokolotše Phetolelo ya Lefase le Lefsa ya Mangwalo a Bokriste a Segerika ka Sebelize Kriol. Batho ba go feta 1 300 ba ile ba bogela ka bidio ge se se direga.

Go tšere sehlopha sa bafetoledi ba tshela dikgwedi tše 16 gore ba fetše go fetolela Beibele ye. Yo mongwe wa bona o rile ge a bolela ka mehola ya phetolelo ye e mpsha, a re: “Bjale bana babo rena le dikgaetšedi ba na le Beibele yeo e nepagetšego le yeo ba ka e tshepago. E tlo ba bjalo ka lebone leo le ba neago seetša ge ba bala Lentšu la Modimo.”

Yo mongwe a re: “Ge bolwetši bja coronavirus bo dutše bo tšwela pele, bana babo rena le dikgaetšedi bao ba bolelago SeBelize Kriol ba tla kgona go bala Mangwalo ka leleme la bona. Se se tla ba homotša, sa ba thuša gore ba se belaele le go kgotlelela mathata ao a ka ba welago.”

Nageng ya Belize, go na le bagoeledi ba 867 diphuthegong tše 19 tša leleme la Sebelize Kriol. Go na le bagoeledi ba bangwe gape ba 58 United States bao ba šomago tšhemong ya Sebelize Kriol.

Ngwanabo rena Jesse Pérez, wa Komiti ya Lekala la Amerika Bogareng, o lokolotše Phetolelo ya Lefase le Lefsa ya Mangwalo a Bokriste a Segerika ka Setotonac. Batho ba e ka bago ba 2 200 go tšwa diphuthegong tše 50 tša leleme la Setotonac ba bogetše tiragalo ye ka bidio.

Go tšere sehlopha sa bafetoledi mengwaga ya ka godimo ga e meraro gore ba fetše go fetolela Beibele ye. Phetolelo ye e tlo thuša bagoeledi gore ba kgone go botša batho ba ka godimo ga 250 000 bao ba bolelago Setotonac kua Mexico ditaba tše dibotse.

Yo mongwe wa bafetoledi ba o rile: “Go fapana le Dibeibele tše dingwe tša leleme la Setotonac, Phetolelo ya Lefase le Lefsa ya Mangwalo a Bokriste a Segerika e šomiša polelo yeo re e dirišago letšatši le letšatši. Ga bjale go tlo ba bonolo gore re hlalosetše batho ba mo re dulago gona seo Beibele e se rutago.”

Mofetoledi yo mongwe o re: “Ke kgale bana babo rena le dikgaetšedi ba nyaka Beibele ya mohuta wo. Pele e eba gona, bagoeledi ba bangwe ba be ba fetolela ditemana tša Beibele go tšwa go Sepanishi go ya go Setotonac gore ba kgone go di šomiša ge ba nea polelo dibokeng tša gare ga beke. Ga bjale ga go sa hlokagala gore ba dire se ge ba nyaka go šomiša Mangwalo a Segerika.”

Karolo e bohlokwa kudu ya phetolelo ye ke gore e šomiša mengwalo ya ka tlase go ngwala mahlalosetšagotee goba mantšu a mangwe ao a bolelago selo se se swanago le ao a dirišitšwego mangwalong. Ka ge mantšu a a dirišwa ke batho ba go bolela mebotwana e sa swanego ya Setotonac, phetolelo ye e tlo kgahla batho ka moka bao ba bolelago leleme le.

Re thaba le bana babo rena le dikgaetšedi bao ba hweditšego Dibeibele tše ka maleme a bona. Re kgodišegile gore tumelo ya bona e tla tia ge ba dutše ba šomiša ‘tšhoša ya moya’ ge ba ruta batho Beibele le ge ba dira thuto ya bona ya motho ka noši.—Baheberu 4:12.