KUA New York, Dihlatse tša Jehofa di itokišeletša dikopano tša tšona tša selete tša ngwaga le ngwaga gotee le lesolo la go mema batho. Sehlogo sa kopano ya bona sa ngwaga wo se re: “Lentšu la Modimo ke Therešo!” Dikopano tša Dihlatse di thoma kua United States ka May gomme tša tšwela pele lefaseng ka bophara go fihla mafelelong a December.

J. R. Brown, yo e lego mmoleledi wa Dihlatse tša Jehofa o re: “Sehlogo sa kopano ya ngwaga wo ke sa bohlokwa ka gobane se bolela ka selo seo Dihlatse tša Jehofa di se tšeelago godimo. Malapa a Dihlatse a bota tlhahlo e hwetšwago ka Beibeleng e bile a e bona e le mothopo wa keletšo matšatšing a a thata. E bile re nagana gore batho ka moka ba tla holwa le go thabela lenaneo le leo le nago le dilo tše di fapafapanego.”

Morena Brown o re Dihlatse tša Jehofa di tšeela godimo go ithuta Beibele. Mantšiboa a mangwe bekeng e nngwe le e nngwe, malapa a Dihlatse a ithuta Beibele le go dira nyakišišo gomme a bitša seo “Borapedi bja Lapa.” Morena Brown o oketša ka gore: “Kopano ya ngwaga wo e tla nea malapa le motho ka o tee ka o tee dikgatišo tše difsa tša go ithuta Beibele. Dihlatse di dula di fagahlela dikgatišo tše ngwaga o mongwe le o mongwe ge di eya kopanong ya selete.”

Matšatši le mafelo ao Dikopano tša Selete tša 2013 tša “Lentšu la Modimo ke Therešo!” di tlago go swarelwa go ona a ka hwetšwa Wepesaeteng ya semmušo ya Dihlatse ya jw.org/nso. Ge e ba bangwadi ba ditaba ba nyaka go bega se ditabeng tša bona ba ka ikgokaganya le ofisi ya lekala ya Dihlatse tša Jehofa gore ba hwetše tsebišo e oketšegilego.

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Boditšhaba, mogala +1 718 560 5000