NEW YORK—Ka August 1, 2014, Dihlatse tša Jehofa di tla thoma lesolo la lefase ka bophara la kgwedi ka moka la go phatlalatša pampišana e mpsha ya Re ka Hwetša Kae Dikarabo tša Dipotšišo tša Bohlokwa Bophelong? go tsebiša batho ka Wepesaete ya tšona ya semmušo ya jw.org. Wepesaete ye ya jw.org e fetoletšwe ka maleme a mantši kudu lefaseng ka bophara, e hwetšwagala ka maleme a fetago 500 ebile e na le dikgatišo tšeo di ka taoneloutwago ka maleme a ka bago 700.

Batho ba fapafapanego ba fetago milione ba etela Wepesaete ye ya jw.org letšatši le lengwe le le lengwe. Wepesaete ye e na le dihlogo le dibidio tšeo di neago keletšo bathong ba mengwaga ka moka, ditlogo le maemo. E nngwe ya dibidio yeo e rego Ke ka Baka la Eng o Swanetše go Ithuta Beibele? e tla ba le linki ya khoutu ya QR ye e lego pampišaneng ye e mpsha. Bidio ye e diriša maemo a kgonthe a bophelo le diswantšho go bontšha mehola ya go ithuta Beibele. Ga bjale bidio ye e hwetšagala ka maleme a fetago 450 gomme e taoneloutilwe ka makga a fetago dimilione tše nne go tloga mola e lokolollwago ka November 18, 2013.

J. R. Brown, mmoleledi wa Dihlatse tša Jehofa ntlongkgolo ya tšona kua Brooklyn, New York, o hlalositše gore: “Re thabišitšwe ke lesolo le. Go na le Dihlatse tša Jehofa tše dimilione tše seswai lefaseng ka moka, gomme ka moka ga rena re tla be re boledišana le baagišani ba rena ka Wepesaete ye. Le ke lesolo le legolo kudu leo le kilego la rulaganywa.”

Geoffrey Jackson, e lego setho sa Sehlopha se Bušago sa Dihlatse tša Jehofa o re: “Ga e sa le go lokollwa Wepesaete ye mengwageng e mebedi e fetilego, batho lefaseng ka bophara ba hweditše jw.org e le mothopo o bohlokwa kudu. Go yona o ka kgona go lebelela dibidio tšeo di ka thušago bana, wa bala dihlogo tšeo di ka thušago lapa la gago le go bala Beibele mo inthaneteng. Re nyaka gore batho ba bantši ka mo go ka kgonegago ba holwe ke jw.org, ke ka lebaka leo re ilego ra thoma lesolo le le kgethegilego.”

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Boditšhaba, mogala +1 718 560 5000