MEXICO CITY—Dihlatse tša Jehofa tše fetago tše 250 di ile tša ithaopela go hlwekiša lefelo la dipapadi la Baldomero “Melo” Almada ka June 7, 2014 go lokišetša moletlo wa setšhaba wa bohlokwa gomme se se ile sa dira gore mmušo o leboge maiteko ao.

Ka dikgwedi tše dintši, Moprofesara Antonio Cota Márquez, e lego molaodi wa Lefapha la Kgoro ya Dipapadi la Huatabampo kua Mexico, o ile a nyaka baithaopi go tlo hlwekiša lepatlelo e sa le nako pele ga ge tonakgolo a ka bula semmušo mabala a mafsa a go kitima ka July 7, 2014. Dihlatse tša Jehofa di ile tša arabela kgopelong ya molaodi gomme tša tla go thuša yena le bahlwekiši ba lefelo leo ka go kaonefatša maemo a lona, ao a bego a akaretša go olela ditšhila lepatlelong leo, go penta dipala tša basketball le go dira mediro e mengwe.

Molaodi Cota o phethile ka go bitša Dihlatse ka ge a be a tseba kamoo di hlokomelago diholo tša lefelong leo la dipapadi ka mehla ge di swara mananeo a mahala a thuto ya Beibele ka Sepanishi le Semayo. Ka morago ga go bona tsela yeo Dihlatse di hlwekišitšego le go lokiša lefelo leo, Molaodi Cota o itše: “Re thabela go bona batho bao ba ikgafago le bao ba neelago nako ya bona go tlo hlwekiša lefelo la rena la dipapadi.” Ka morago o ile a bolela gore: “Legatong la meyara Ramón Díaz Nieblas, hle amogelang ditebogo tša rena ka modiro wa lena letšatšing le. Re tla tšwela pele go thekga mokgatlo wa lena ge o diriša lefelo le. Re thabišwa kudu ke go šoma ga lena ka thata le go ba le maikarabelo modirong wo.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Mexico: Gamaliel Camarillo, mogala + 52 555 133 3000