MEXICO CITY—Dihlatse tša Jehofa di be di le gare ga mekgatlo e 150 ya go gatiša le go rekiša dipuku yeo e tšerego karolo Pontšhong ya dipuku le Dimakasine, yeo e bego e rulagantšwe ke mokgatlo wa bagatiši wa National Chamber for the Mexican Publishing Industry (CANIEM). Pontšho ye, yeo e bego e swaretšwe World Trade Center kua Mexico City go tloga ka April 25 go ya go May 4, 2014, e be e keteka mengwaga e 50 ya go ba gona ga mokgatlo wa CANIEM. Batho ba e ka bago ba 20 000 ba bile gona tiragalong ye.

Dihlatse di ile tša bea phatlalatša dipuku tše di fapafapanego tšeo di theilwego Beibeleng, dimakasine le dibidio. Di ile tša bontšha gape le Wepesaete ya tšona ya semmušo ya www.pr418.com, moo o ka kgonago go taonelouta dipuku le dipukwana tša tšona tšeo di hwetšagalago ka maleme a fetago 650. Baeng ba ile ba ikhweletša dipuku le dipukwana tše fetago 1 600 go tšwa go Dihlatse gomme ba bangwe ba kgopela go etelwa magaeng a bona. Ka ge e le mokgwa o tlwaelegilego wa Dihlatse tša Jehofa, bohle bao ba tlilego pontšhong ba ile ba newa dipuku le dipukwana le thuto ya legae ya Beibele ntle le tefo.

Gamaliel Camarillo e lego mmoleledi wa Dihlatse tša Jehofa kua Mexico o boletše gore: “Re thabišitšwe kudu ke go bona batho ba bantši ba etla go bogela dipuku tša rena e bile ba bontšha kgahlego Beibeleng le Wepesaeteng ya rena ya jw.org. Re e tšea e le tirelo ya setšhaba go dira gore batho bao ba dulago ba swaregile ba hwetše dipuku le dipukwana ntle le tefo ge ba di nyaka. Go tšea karolo ga rena pontšhong ye e bile katlego e kgolo.”

Ba Ditaba:

Bakeng sa Ditšhabatšhaba: J R. Brown, Ofisi ya Boditšhabatšhaba, mogala +1 718 560 5000

Mexico: Gamaliel Camarillo, mogala +52 555 133 304