MEXICO CITY—Dihlatse tša Jehofa di lokolotše Phetolelo ya Lefase le Lefsa ya Mangwalo a Bakriste a Segerika ka Setzotzil kopanong ya selete yeo e bego e le ka December 26-28, 2014, toropong ya Tuxtla Gutierrez, Chiapas. Kopano ye ya “Tšwelang Pele le Tsoma Mmušo wa Modimo Pele!” e be e swerwe ka Setzotzil, e lego leleme leo le bolelwago nageng ya Maya gomme lenaneo le ile la gašwa le lefelong le lengwe la kopano leo le lego Comitan, Chiapas. Go tlaleletša go Beibele yeo e lokolotšwego, batho ka moka ba 5 073 bao ba bego ba tlile kopanong ba ile ba hwetša dipuku le dipukwana tše difsa tše tshela ka Setzotzil.

Mmoleledi wa Dihlatse tša Jehofa tša Mexico e lego Gamaliel Camarillo o boletše gore: “Re thabišitšwe ke go lokollwa ga Phetolelo ya Lefase le Lefsa ya Mangwalo a Bakriste a Segerika ka Setzotzil. Re fagahletše go tlo abelana Beibele ye le baagišani ba rena bao ba bolelago Setzotzil.”

Secretariat of Public Education for Mexico, e lego mokgatlo wo o kgonthišetšago gore melao ya thuto e dirišwa gabotse ,o boletše gore Setzotzil se bolelwa ke batho ba fetago 350 000 bao ba dulago Baja California, Campeche, Chiapas, Oaxaca le Veracruz. E le gore molaetša wa Beibele o kgone go fihlelela batho ba go bolela Setzotzil, Dihlatse di hlomile ofisi ya bofetoledi ya Setzotzil toropong ya San Cristobal de las Casas Chiapas, gomme ofisi ye e na le bafetoledi ba 15. Ka 2002, Dihlatse di ile tša lokolla puku ya tšona ya mathomo ka Setzotzil. Ga bjale Dihlatse tša Jehofa di na le dipuku le dipukwana tše fetago tše 60 tšeo di ka taoneloutwago ka Setzotzil Wepesaeteng ya rena ya semmušo ya jw.org.

Ba Ditaba:

Bakeng sa Ditšhabatšhaba: J R. Brown, Ofisi ya Boditšhabatšhaba, mogala +1 718 560 5000

Mexico: Gamaliel Camarillo, mogala +52 555 133 3048