NOVEMBER 1, 2016
PHILIPPINES
Dihlatse di Rulaganya Modiro wa Tlhakodišo ka Morago ga Ledimo le Legolo Leo le Hlasetšego Philippines
Dihlatse tša Jehofa di thuša badumedigotee le tšona le batho ba bangwe bao ba wetšwego ke kotsi ya ledimo le matla leo le bitšwago Sarika (tikologong yeo le tsebja e le Karen) le leo le bitšwago Haima (tikologong yeo le tsebja e le Lawin) ao a ilego a hlasela sehlakahlaka sa Luzon ka leboa la Philippines, ka di-16 le di-19 tša October 2016. Ledimo leo le bitšwago Haima, e bile le lengwe la madimo a matla kudu ao a ilego a tšutla Philippines ga e sa le naga ye e sentšwe ke ledimo le lešoro kudu leo le bitšwago Haiyan (tikologong yeo le tsebja e le Yolanda) ka 2013.
Ga go le o tee wa Dihlatse tša Jehofa tše 200 000 tša Philippines yo a ilego a hwa goba a gobala kudu kotsing yeo. Lega go le bjalo, dipego tša ka morago ga kotsi yeo di begile gore moya o matla, mafula le maraga ao a bakilwego ke ledimo la Haima, di ile tša senya dintlo tše 1 058 tša Dihlatse tša Jehofa le Diholo tša Mmušo tše 43 goba mafelo a borapedi.
Ofisi ya lekala ya Dihlatse tša Jehofa kua Philippines e rulagantše komiti ya tlhakodišo toropong ya Tuguegarao, sehlakahlakeng sa Luzon. Komiti yeo e thuša batho ka go ba nea dilo tše bjalo ka dijo le meetse. Go fihla mo nakong ye, dilori tše seswai tšeo di tletšego dilo tša go hlakodiša bao ba wetšwego ke kotsi di rometšwe mafelong ao. Le gona ofisi ya lekala e šetše e thomile go rulaganya modiro wa go dira magae a motšwa-o-swere le go lokiša dintlo le Diholo tša Mmušo tšeo di senyegilego.
Sehlopha se Bušago sa Dihlatse tša Jehofa se etelela pele modiro wa tlhakodišo se le ntlongkgolo ya rena, se diriša meneelo yeo e ntšhitšwego go thekga modiro wa Dihlatse wo o dirwago lefaseng ka moka.
Ba Ditaba:
Bakeng sa Dinaga tše Dingwe: David A. Semonian, Ofisi ya Ditaba tša Setšhaba, 1-718-560-5000
Philippines: Dean Jacek, 63-2-224-4444