MANILA, Philippines—Dihlatse tša Jehofa tša Philippines di šetše di thomile modiro o mogolo wa go lokiša meago yeo e sentšwego ke Ledimo le matla leo le bitšwago Nock-Ten (kua Philippines le bitšwa “Nina”).

Ledimo leo le hlasetšego tikologong ya Bicol ka di-25 tša December 2016 le sentše kudu. Go begilwe gore ledimo leo le bolaile batho ba 10 le go senya meago ya ka godimo ga e 390 000. Le ge go se na Dihlatse tša Jehofa tšeo di hlokofetšego goba go gobala kudu, eupša dintlo tša tšona tša ka godimo ga tše 300 le mafelo a 24 ao di kopanago go wona (a bitšwa Diholo tša Mmušo) a senyegile ganyenyane gomme a mangwe a gogotšwe ke ledimo leo. Ofisi ya lekala ya Dihlatse tša Jehofa ya Philippines e ile ya hloma komiti ya tlhakodišo Toropong ya Naga gore e thuše Dihlatse tšeo magae a tšona le Diholo tša Mmušo di senyegilego.

Dean Jacek, yo e lego seboleledi sa Dihlatse tša Jehofa tša kua Philippines o re: “Go fihla ga bjale, baithaopi ba re thušitše go lokiša dintlo tše 271 tša badumedigotee le rena, le Diholo tša Mmušo tše 22. Ba sa tlo feleletša go lokiša dintlo tše 38 le Diholo tša Mmušo tše pedi. Re nyaka go fetša go lokiša mafelelong a kgwedi ya April 2017.”

Modiro wo o dirwago ke Dihlatse tša Jehofa lefaseng ka moka, go akaretša le modiro wa tlhakodišo, o rulaganywa ke Sehlopha se Bušago e bile o thekgwa ka meneelo ya boithatelo. Go na le Dihlatse tša Jehofa tše fetago tše dimilione tše 8 lefaseng ka moka, gomme tše 209 000 tša tšona di kua Philippines.

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, +1-845-524-3000

Philippines: Dean Jacek, +63-2-224-4444