Ka August 5, 2015, Kgorokgolo ya Tsheko ya Russia e ile ya theetša boipiletšo bja Mokgatlo wa Bodumedi wa Dihlatse tša Jehofa toropong ya Abinsk. Kgoro ya tsheko ya Abinsk ka go latela maano a dikgoro tša tsheko tša Taganrog le Samara, e ile ya fediša mokgatlo wa bodumedi wa Dihlatse tša Jehofa mathomong a ngwaga wo.

Phuthego ya Dihlatse tša Jehofa toropong ya Abinsk e na le ditho tše e ka bago tše 100, tšeo tše dingwe tša tšona e lego bakgalabje le bakgekolo. Mokgatlo wo wa bodumedi toropong ya Abinsk o ngwadišitšwe ka November 1999 gomme ke mokgatlo wa semolao wo o laolago Diholo tša Mmušo tšeo e lego mafelo a borapedi a Dihlatse tša Jehofa.

Ka December 2012 le ka October 2013, balaodi ba mmušo ba ile ba phara Dihlatse tša Jehofa tše pedi tša toropong ya Abinsk molato wa go tshela molao ka ge di ile tša fa batho dipuku tšeo go thwego di bontšha go fišegela bodumedi ka mo go fošagetšego. Dihlatse tše ka bobedi di be di tšewa gore ke tša phuthego ya toropong yeo, eupša e be e se tša Abinsk. Motšhotšhisi o ile a hlokomologa taba ye gomme a diriša ditatofatšo tša banna ba tšeo di se nago moo di theilwego gona e le lebaka la go fediša Mokgatlo wa Bodumedi wa Dihlatse tša Jehofa.

Ka baka la ditatofatšo tše, ka March 4 2015, Kgoro ya Tsheko ya Krasnodar e ile ya dira phetho ya “gore Mokgatlo wa Bodumedi wa Dihlatse tša Jehofa wa Toropong ya Abinsk . . . o fišegela bodumedi ka mo go fošagetšego le gore o swanetše go fedišwa le go phumolwa lenaneong la Uniform State Register of Legal Entities (mokgatlo wa mmušo wa go ngwadiša mekgatlwana e mengwe).” Kgoro e phethile gape ka gore Holo ya Mmušo ya Dihlatse ya Abinsk e be ka tlase ga taolo ya Mmušo. Ge e ba Kgorokgolo ya Tsheko e dumelelana le phetho yeo, gona Dihlatse tša Abinsk di tla lahlegelwa ke ntlo ya tšona ya borapedi.

Ka go diriša gampe Molao wa Naga wa go Fediša Mediro ya Bao ba Fišegelago Bodumedi ka mo go Fošagetšego, balaodi ba mmušo ba Abinsk ba ile ba diriša maano ao a ilego a dirišwa ke balaodi ba mmušo ba Taganrog le Samara a go fediša Mekgatlo ya Bodumedi ya Dihlatse tša Jehofa ditoropong tše. Go swana le seo se diregilego Abinsk, ditatofatšo tša gore mediro ya Dihlatse e fišegela bodumedi ka mo go fošagetšego ga di na motheo. Dihlatse tša Jehofa tša Taganrog le Samara di leka ka thata go ikemela kgorong ya tsheko kgahlanong le ditatofatšo tše tša maaka. Di dirile boipiletšo Kgorong ya Tsheko ya Ditokelo tša Batho ya Yuropa mabapi le go gatakelwa ga tokologo ya tšona ya bodumedi.

Sehlopha se senyenyane sa Dihlatse tša Jehofa tša Abinsk se tla tšwela pele ka mediro ya sona ya bodumedi go swana le Dihlatse tše dingwe lefaseng ka moka. Lega go le bjalo, Dihlatse tša Jehofa di holofela gore Kgorokgolo ya Tsheko ya Russia e tla lemoga go hloka toka ga phetho ya kgoro ya tsheko ya tlasana gomme ya dumelela Dihlatse tša toropong ya Abinsk go tšwela pele di bokana ka khutšo mafelong a tšona a borapedi.