NEW YORK—Dihlatse tša Jehofa lefaseng ka moka di ngwala mangwalo a go kgopela thušo go Mopresitente wa Russia le Kgorong ya Tsheko e Phagamego, ka ge Dihlatse tša Russia di tšhošetšwa ka gore modiro wa tšona o tla thibelwa. Sehlopha se Bušago sa Dihlatse tša Jehofa se kgopela Dihlatse tša ka godimo ga tše 8 000 000 lefaseng ka moka gore di ngwale mangwalo ao.

Ka di-15 tša March 2017, Lefapha la Toka la Russia le rometše lengwalo Kgorong ya Tsheko e Phagamego ya Naga ya Russia le nyaka gore Ofisi e Kgolo ya Dihlatse tša Jehofa Russia e tsebje ka gore e dira mediro e kotsi kudu gomme e tswalelwe. Le gona lengwalong leo ba ngwadile gore ba nyaka gore mediro ya Ofising yeo e Kgolo e emišwe. Ge e ba Kgoro ya Tsheko e Phagamego e ka dumelelana le taba yeo, Ofisi ya Dihlatse tša Jehofa yeo e lego kgauswi le St. Petersburg e tla tswalelwa. Ka morago ga moo, Mekgatlo ya Bodumedi ya Dihlatse tša Jehofa e ka bago e 400 yeo e ngwadišitšwego semmušo e tla fedišwa, gomme seo se tla dira gore mediro ya diphuthego tša ka godimo ga tše 2 300 tša Dihlatse tša Jehofa kua Russia e se be molaong. Ofisi e kgolo gotee le mafelo a borapedi ao a dirišwago ke Dihlatse nageng ka moka a ka tšewa ke Mmušo. Go oketša moo, Dihlatse tša Jehofa di tla bonwa molato wa go dira mediro ya tšona ya bodumedi. Go letetšwe gore Kgoro ya Tsheko e Phagamego e ahlole taba ye ka di-5 tša April.

Seboleledi sa Dihlatse tša Jehofa ntlongkgolo ya tšona e lego David A. Semonian, o itše: “Sehlopha se Bušago sa Dihlatse tša Jehofa se nyaka gore batho ba bantši ka mo go ka kgonegago ba tsebe ka taba ye ya bohlokwa. Go latofatša badudi bao ba se nago bošoro le bao ba kwago molao wa naga bjalo ka ge eka ke batšhošetši, go tloga go le kgahlanong le melao ya go lwantšha mediro e kotsi. Tatofatšo ye e theilwe dipegong tša maaka.”

Lesolo le la Dihlatse tša Jehofa la lefaseng ka moka ga le thome lehono. Mengwageng e ka bago e 20 e fetilego, Dihlatse tša Jehofa di ile tša ngwala mangwalo a go lwela barapedigotee le tšona kua Russia ka ge batho ba bangwe bao ba šomago mmušong ba be ba di bolela gampe. Go oketša moo, nakong e fetilego Dihlatse di kile tša diriša masolo a a go ngwala mangwalo gore di tutueletše balaodi ba mmušo gore ba kgaotše go tlaiša Dihlatse tša Jehofa nageng ya Jordan, Korea le Malawi.

Morena Semonian o oketša ka gore: “Go bala Beibele, go opela le go rapela le badumedigotee le wena e tloga e se molato. Re holofela gore lesolo la rena la lefaseng ka moka la go ngwala mangwalo, le tla dira gore mmušo wa Russia o se thibele modiro wa badumedigotee le rena.”

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, +1-845-524-3000

Russia: Yaroslav Sivulskiy, +7-812-702-2691