Dikgwedi tše šupa ka morago ga gore Kgorokgolo ya Tsheko ya Russia e bolele gore Wepesaete ya www.pr418.com e bontšha go fišegela bodumedi ka mo go fošagetšego, bahlankedi ba mmušo wa Russia ba ile ba thibela Wepesaete ya semmušo ya Dihlatse tša Jehofa. Thibelo ye e ile ya thoma ka di 21 tša July 2015, ge Russian Federation Ministry of Justice (Mokgatlo wa go ikarabela ka go thea le go kgonthišetša melao ya mmušo le ditekanyetšo tša molao) e tsenya jw.org Lelokelelong la Dilo ka Moka tša Mekgatlo ya go Fišegela Bodumedi ka mo go Fošagetšego. Dikhamphani tša Inthanete nageng ya Russia ka moka di ile tša dira gore go se kgonagale go tsena Wepesaeteng ya jw.org, e bile ga bjale go tsena Wepesaeteng ye goba go tsebiša batho ka yona ke molato wa bosenyi. Russia ke naga e nnoši lefaseng ka moka yeo e thibetšego jw.org.

Dihlatse tša Jehofa nageng ya Russia di be di sa tsebe gore ka 2013, balaodi ba mmušo toropong ya Tver ba ile ba bula molato wa go nyaka go thibela Wepesaete. Motšhotšhisi o ile a dira boipiletšo Kgorong ya Tsheko ya Selete ya Tsentralniy bja gore jw.org e thibelwe ka gore e na le dipuku tše mmalwa tša bodumedi bja Dihlatse tša Jehofa tšeo kgoro ya tsheko ya Russia e boletšego gore di bontšha go fišegela bodumedi ka mo go fošagetšego. * Ka di 7 tša August, 2013, kgoro ya tsheko ya selete e ile ya dumelelana le boipiletšo bja motšhotšhisi ntle le go tsebiša Dihlatse tša Jehofa le go phetha ka gore jw.org e bontšha go fišegela bodumedi ka mo go fošagetšego.

Ka morago ga gore Dihlatse di kwe ka phetho ye ditabeng kgwedi ka morago, di ile tša dira boipiletšo le go tloša dipuku tšeo go thwego di bontšha go fišegela bodumedi ka mo go fošagetšego nageng ye. Ka di 22 tša January, 2014, Kgoro ya Tsheko ya Selete ya Tver e ile ya fediša phetho yeo e dirilwego ke kgoro ya tsheko ya tlasana ka go bolela gore kgoro ye ga e na mabaka a motheo a molao a go thibela jw.org le gore e be e swanetše go ba e tsebišitše beng ba Wepesaete go tla tshekong.

Ka ge a sa kgotsofatšwa ke kahlolo ya kgoro ya tsheko ya selete, Motlatša Motšhotšhisi Pharephare e lego S. G. Kekhlerov, o ile a dira boipiletšo Kgorongkgolo ya Tsheko ya Russia. Dihlatse ga se tša ka tša tsebišwa ka tsheko ya molato wo. Lega go le bjalo, ka di 2 tša December 2014, Kgorokgolo ya Tsheko e ile ya sekaseka boipiletšo bja motšhotšhisi, Dihlatse di se gona.

Kgorokgolo ya Tsheko e kgonthišeditše gore Dihlatse di tlošitše dipuku tšeo go thwego di bontšha go fišegela bodumedi ka mo go fošagetšego Wepesaeteng gateetee ka morago ga kahlolo yeo e dirilego ke kgoro ya tsheko ya tlasana ka 2013, eupša e ile ya bolela gore dipuku tše di ka tla tša tšwelela gape Wepesaeteng. Ka gona, Kgorokgolo ya Tsheko e ile ya fetola kahlolo ya kgoro ya tsheko ya selete ke moka ya thekga kahlolo ya kgoro ya tlasana ya gore jw.org e bontšha go fišegela bodumedi ka mo go fošagetšego. * Dihlatse tša Jehofa di ile tša dira boipiletšo bjo bongwe Kgorongkgolo ya Tsheko kgahlanong le phetho yeo e e dirilego, eupša Kgorokgolo e ile ya gana boipiletšo bjoo. Dihlatse di ile tša dira boipiletšo go Modula Setulo wa Kgorokgolo ya Tsheko, yoo a ilego a bo gana ka di 8 tša July, 2015.

Dihlatse tša Jehofa di ile tša ba kgahlanong le kahlolo ya Kgorokgolo ya Tsheko ka ge mabaka a yona a sa kwagale ka baka la gore dipuku tša bodumedi tšeo go thwego di bontšha go fišegela bodumedi ka mo go fošagetšego di be di tlošitšwe Wepesaeteng ya jw.org go tloga ka 2013. Ka baka la phetho ya Kgorokgolo, balaodi ba mmušo wa Russia ba ile ba laela dikhamphani tša inthanete gore di tswalele jw.org Russia ka moka. Se se ile sa dira gore batho bao ba tsenago Wepesaeteng ye ba palelwe ke go bala Beibele ka maleme a fetago 130 le dipuku tšeo di theilwego Beibeleng ka maleme a fetago 700, go akaretša Serussia le Polelo ya Diatla ya Russia. Motho yo a bolelago goba go kgothaletša ba bangwe go tsena Wepesaeteng ye nageng ya Russia o bonwa molato wa bosenyi ka baka la go dira modiro wo go thwego o bontšha go fišegela bodumedi ka mo go fošagetšego. Ka baka la thibelo ye, Dihlatse tša Jehofa tše fetago 170 000 nageng ya Russia ga di sa holwa ke Wepesaete ye.

Phetho ya Kgorokgolo ya Tsheko e ka dira gore balaodi ba mmušo wa Russia ba gatelele mediro ya bodumedi yeo e dirwago ka khutšo ya Dihlatse tša Jehofa. Ge e ba balaodi ba bangwe ba mmušo ba diriša gampe Molao wa Russia wa go Fediša Mediro ya Bao ba Fišegelago Bodumedi ka mo go Fošagetšego, gona tokologo ya bodumedi nageng ye e tla gatakelwa goba ya ba kotsing. Dihlatse tša Jehofa di tloga di holofela gore balaodi ba mmušo ka toka ba tla thekga tokelo ya motheo ya tokologo ya borapedi le ya gore tsheko e sepedišwe ka toka ka ge ditokelo tše di thekgwa ke molaotheo wa naga ya Russia le tumelelano yeo e e dirilego le mebušo e mengwe.