Lefapha la Toka la Russia le nyaka gore go dirwe dinyakišišo tše di tseneletšego ka Ofisi e Kgolo ya Dihlatse tša Jehofa Russia. Ka di-1 tša February 2017, Ramolao yo Mogolo o ile a laela Lefapha la Toka gore le tsebiše Dihlatse tša Jehofa gore lefapha leo le tlo hlahloba Ofisi ya tšona e Kgolo. E le gore Lefapha la Toka le thome mošomo wo wa go hlahloba Ofisi e Kgolo wo o bego o tlo dirwa ka di-8 go fihla ka di-27 tša February, le ile la laela Ofisi e Kgolo gore e tliše direkhoto ka moka tša mabapi le lefelo leo Ofisi e agilwego go lona, dipego tša ditšhelete, e hlalose gore mokgatlo o rulagantšwe bjang, e hlalose modiro wa go ruta le dilo tšeo Dihlatse di di dumelago. Ofisi e Kgolo e ile ya romela dipego tšeo di bego di nyakega tša matlakala a ka godimo ga a 73 000 mmušong ka di-15 tša February 2017.

Mošomo wo o mogolo wa go hlahloba Ofisi e Kgolo ya Dihlatse tša Jehofa o ile wa thoma ka moragonyana ga phetho yeo e sa tšwago go dirwa Kgorong ya Tsheko ya Moscow ya go dumelelana le taelo yeo Ramolao yo Mogolo a e neilego Ofisi e Kgolo ka March 2016. Ramolao yoo yo Mogolo o tšhošeditše Dihlatse tša Jehofa ka gore o tla tswalela Ofisi ya tšona e Kgolo ka ge a re di dira mediro e kotsi kudu. Ga e sa le go tloga ka nako yeo, dikgoro tša tsheko ditikologong tše dingwe tša Russia di dirile phetho ya go fediša mekgatlo e mmalwa ya Dihlatse tša Jehofa ka melato ya gore di dira mediro e kotsi kudu. Dikgoro tšeo di dirile phetho ye le ge go na le bohlatse bja kgonthe bja gore seo se bolelwago ke maaka.

Dihlatse tša Jehofa kua Russia di tshwenyegile ka taba ya gore ka morago ga gore Ofisi ya tšona e hlahlobje, e ka no tswalelwa. Go fihla ga bjale, Mmušo wa Russia o bontšhitše gore ga se wa ikemišetša go latela melao yeo e dirišwago dinageng tše dingwe ya mabapi le ditokelo tša batho, ka gobane o hlasela Dihlatse tša Jehofa tšeo di nago le khutšo e bile o nyaka go thibela mediro ya tšona.