APRIL 10, 2015
RUSSIA
Hlatse e Hwetša Tšhelete Gomme e e Bušetša go Mong wa Yona
ST. PETERSBURG, Russia—Ka November 2014, Svetlana Nemchinova, e lego Hlatse ya Jehofa o ile a topa enfelopo seterateng yeo e bego e na le di-euro tše 6 000 (ka godimo ga R82 000). Ka morago ga go fetša nako e telele a nyaka mong wa tšhelete yeo, o ile a kgona go bušetša tšhelete yeo. Botho bjo bo bontšhitšwego ke Moh. Nemchinova bo ile bja bolelwa thelebišeneng, radiong le inthaneteng.
Moh. Nemchinova o hlwekiša diterata toropong ya Vologda, yeo e ka bago dikhilomithara tše 450 ka leboabohlabela bja Moscow. Ge a le mošomong o ile a bona enfelopo gomme ge a e lebelela ka gare, o ile a bona tšhelete e ntši. Le ge Moh. Nemchinova le bana ba gagwe ba bararo ba dula ka ntlong e nyenyane, o boletše gore: “Ga se nke ka nagana le ka go itšeela tšhelete yeo. Ke ile ka thoma go nagana ka motho yo a bego a tshwenyegile kudu ka yona.”
Moh. Nemchinova o ile a leka go hwetša mong wa tšhelete yeo ka go phara tsebišo mo meagong ya kgaufsi. Ge a sa hwetše mong wa yona, Moh. Nemchinova o ile a tšea tšhelete yeo a e iša pankeng ka ge enfelopo yeo e be e na le rasiti yeo e bego e na le leina la panka. Panka e ile ya hwetša gore tšhelete yeo e be e le ya Pavel Smirnov. Ka morago ga go leka go ikgokaganya le Mna. Smirnov, panka yeo e ile ya kgona go mo tsebiša gore Moh. Nemchinova o hweditše tšhelete ya gagwe.
Kuranta ya Russia e lego Premier e ngwadile gore: “Svetlana ga a tšee seo a se dirilego e le selo se segolo kudu. Ke motho yo a tšeelago bodumedi godimo e bile o bala Beibele ka mehla.” Moh. Nemchinova o tšwetše pele ka go hlalosetša kuranta ya Premier gore selo seo a se dirilego e be e le go diriša seo gantši se bitšwago Molao wa Gauta wo o hwetšwago go Mateo 7:12 wo o rego: “Ka baka leo, dilo tšohle tše le nyakago batho ba le dira tšona, le lena le ba dire tšona.”
Rabokgabo Pavel Smirnov a eme le Svetlana Nemchinova ka morago ga gore a buše tšhelete ya gagwe yeo e bego e timetše.
Mna. Smirnov, e lego rabokgabo yo a hlamilego motswako o itšego wa pente, o be a boloka tšhelete go reka ditlabakelo tša maemo a godimo e le gore a kgone go tšwetša pele nyakišišo ya gagwe ya mabapi le tsela yeo taye e dirilwego ka yona. Mna. Smirnov o boletše gore: “Ga ke na mantšu a go leboga Svetlana. Selo seo Svetlana a se dirilego se dira gore kholofelo ya gago bathong e se hwelele. Se se šetšego feela ke go dumela gore: ‘Modimo o gona!’”
Ba Ditaba:
Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000
Russia: Yaroslav Sivulskiy, mogala +7 812 702 2691