Ka di-16 tša January 2017, Kgoro ya Tsheko ya Moscow e ile ya gana boipiletšo bja Dihlatse tša Jehofa bja temošo ye e sego molaong yeo e tšwago go Ramolao yo Mogolo ya mabapi le gore ofisi e kgolo ya Dihlatse tša Jehofa e tlo tswalelwa. Baahlodi ba bararo ba ile ba ganana le bohlatse bja boramolao ba Dihlatse tša Jehofa gomme ba dira phetho ya bona ka morago ga go khutša metsotso e 10. Phetho ye e be e dumelelana le yeo e dirilwego ke Ramolao yo Mogolo Kgorong ya Tsheko ya Tverskoy ka di-12 tša October 2016. Gona bjale go dirwa ka go dumelelana le temošo yeo e ilego ya newa Dihlatse ka di-2 tša March 2016. Lega go le bjalo, ga go tsebege gore temošo yeo e tla ama tokologo ya bodumedi bja Dihlatse tša Jehofa tša Russia bjang.