Ka October 8 2014, Kgorokgolo ya Tsheko ya Russia e ile ya theetša boipiletšo bja Dihlatse tša Jehofa kua Samara mabapi le go fedišwa ga bodumedi bja tšona bja lefelong leo. Pejana kgoro ya tsheko e ile ya bolela gore Mokgatlo wa Dihlatse tša Jehofa wa Samara o fišegela bodumedi ka mo go fošagetšego. Ge e ba Kgorokgolo ya Tsheko e ka se fetoše phetho yeo e dirilwego pejana, gona Dihlatse tša Jehofa tše 1 500 tša kua Samara di tla lebeletšana le ditlamorago tše šoro.

Molato kgahlanong le Dihlatse tše o thomile ka April 2014, ge Ofisi ya Selete ya Motšhotšhisi ya Samara e bula molato Kgorongkgolo ya Tsheko ya Selete wa gore go fedišwe bodumedi bja Dihlatse ka ge go thwe mediro ya tšona e fišegela bodumedi ka mo go fošagetšego. Le pele ga ge kgoro ya tsheko ya selete e ka kwa molato wo, ofisi ya motšhotšhisi e be e šetše e thibetše Dihlatse tše e bile ka nakwana e tšere dithoto tša tšona. Ka morago ga phetho ye, Russian Federation Ministry of Justice (Mokgatlo wa go ikarabela ka go thea le go kgonthišetša melao ya mmušo le ditekanyetšo tša molao) e ile ya dira gore Dihlatse tša Samara di tsenywe lelokelelong la mekgatlo ya bodumedi yeo mediro ya tšona e fedišitšwego ka baka la ditatofatšo tša go fišegela bodumedi ka mo go fošagetšego. Ka May 29, 2014, Moahlodi Shabayeva o ile a dira phetho ka go dumelelana le motšhotšhisi gomme a laela gore mokgatlo wa Dihlatse o fedišwe le gore dithoto tša tšona di tšewe.

Le ga se lekga la pele Ofisi ya Selete ya Motšhotšhisi ya Samara e bula molato ka maiteko a go fediša bodumedi bja Dihlatse kua Samara. Ka 2009 ofisi ya motšhotšhisi e ile ya bula molato woo o ilego wa sekwa eupša ka morago ofisi ye e ile ya o phumola. Molatong wo wa gona bjale, bahlankedi ba mmušo wa Samara ba tšere lemanoga le lengwe go atlega leanong la bona.

Ka January 2013 le January 2014, maphodisa a lefelong leo a ile a phuruphutša mafelo ao Dihlatse di a hirilego bakeng sa borapedi gomme a bolela gore a hweditše dipuku le dipukwana tša bodumedi tšeo di le go Lelokelelong la Dilo ka Moka tša Mekgatlo ya go Fišegela Bodumedi ka mo go Fošagetšego. Ofisi ya Motšhotšhisi wa Motse wa Samara e ile ya šupa Dihlatse tše ka monwana mabapi le dilo tšeo di hweditšwego ge go be go phuruphutšwa ka 2013. Ka morago ga ge maphodisa a hweditše dipuku le dipukwana tša bodumedi ka January 2014, ofisi ya motšhotšhisi e ile ya dira gore mmušo o bule molato kgahlanong le Dihlatse tša Samara. Ka March 7, 2014, Kgoro ya Tsheko ya Selete ya Sovetskiy kua Samara e ile ya bona Dihlatse molato gomme ya di lefiša di-ruble tše 50 000 (R15 213). Dihlatse di kgodišegile gore maemong a a mabedi ge go be go phuruphutšwa, maphodisa ke wona a beilego dipuku le dipukwana tšeo go thwego di hweditšwe. Go oketša moo, Dihlatse tša Jehofa di ipelaetša kgahlanong le phetho ya kgoro ya gore e bolele gore dipuku le dipukwana tša tšona di fišegela bodumedi ka mo go fošagetšego gomme di dirile boipiletšo Kgorong ya Tsheko ya Ditokelo tša Batho ya Yuropa.

Ka morago ga gore Kgoro ya tsheko ya Selete ya Sovetskiy e bone Dihlatse molato, Ofisi ya Selete ya Samara e ile ya iša molato wa April 2014 wa gore Dihlatse di fišegela bodumedi kamoo go fošagetšego Kgorong ya Tsheko ya Selete ya Samara. Maiteko a ka moka a be a dirwa e le go fediša bodumedi bja Dihlatse. Boramolao ba Dihlatse ba ipelaeditše go Moahlodi Shabayeva ka gore go fediša bodumedi bja Dihlatse ga go kwagale le gore ga go na selo seo se bontšhago go fišegela bodumedi ka mo go fošagetšego medirong le ditumelong tša Dihlatse tša Jehofa. Le gona boramolao ba ba bolela gore dipuku le dipukwana tšeo go thwego di thibetšwe di beilwe ke maphodisa nakong ya go phuruphutša. Lega go le bjalo, Moahlodi Shabayeva o phethile ka go fediša mokgatlo wa Dihlatse.

Molato wo wa Samara o swana le dikgato tšeo di tšerwego ke bahlankedi ba Mmušo wa Russia kgahlanong le Dihlatse tša Jehofa kua Taganrog, moo bahlankedi ba mmušo ba ilego ba diriša gampe Molao wa Naga wa go Fediša Mediro ya Bao ba Fišegelago Bodumedi ka mo go Fošagetšego. Ba mmušo ba ile ba atlega go fediša mokgatlo wa Dihlatse tša Jehofa kua Taganrog ka 2009 gomme ka morago ba bula molato wa bosenyi kgahlanong le Dihlatse. Molato wo wa bosenyi o ile wa feleletša ka go golegwa le go bonwa molato ga Dihlatse tše šupa tša lefelong leo fela ka ge di be di le dibokeng tša tšona tša bodumedi. Dihlatse tše tša Samara di boifa gore seo se diragaletšego Dihlatse tše tša Taganrog se ka direga le go bona.

Bahlankedi ba mmušo wa Russia ba tla tšwela pele ba tlaiša Dihlatse tša Jehofa go fihla neng? Go tloga ka June 2014, Dihlatse di latofatšwa ka maaka dikarolong tše fapanego tša Russia ka gore di phatlalatša dipuku le dipukwana tšeo di bontšhago go fišegela bodumedi ka mo go fošagetšego. Dihlatse tša Jehofa tša Samara di holofela gore Kgorokgolo ya Tsheko ya Russia e tla bontšha toka molatong wa tšona.