Ka November 12, 2014, Kgorokgolo ya Tsheko ya Boipiletšo ya Russia e ile ya thekga kahlolo ya kgoro ya tsheko ya gore Mokgatlo wa Bodumedi wa Dihlatse tša Jehofa tša Samara o fišegela bodumedi ka mo go fošagetšego. Ofisi ya motšhotšhisi e ile ya bula molato kgahlanong le Dihlatse tša Jehofa tša Samara ka 2014 ka morago ga gore bahlankedi ba tiišetšo ya molao ba phuruphutše lefelo leo Dihlatse di bego di bokana go lona le go bolela gore ba hweditše dipuku le dipukwana tša tšona tša bodumedi tšeo di bego di thibetšwe. Dikgoro tša tsheko tša Russia di be di ahlotše ka gore dipuku le dipukwana tšeo di thibetšwego di tsenywe Lelokelelong la Dilo Tšeo di Bontšhago go Fišegela Bodumedi ka mo go Fošagetšego. * Eupša Dihlatse tša Samara di be di šetše di dirile seo kgoro ya tsheko ya Russia e se boletšego ka go tloša dipuku le dipukwana tšeo mafelong a tšona a borapedi.

Dihlatse di ile tša hlalosetša kgoro ya tsheko le Kgorokgolo ya Tsheko gore maphodisa ao a bego a phuruphutša a beile dipuku le dipukwana tšeo gore ba kgone go bulela Dihlatse molato. Dihlatse di ile tša hlalosa gore Kgoro ya Yuropa ya Ditokelo tša Batho ga bjale e nyakišiša ge e ba dikahlolo tša dikgoro tša Russia tša go thibela dipuku le dipukwana tša tšona di le molaong. Go oketša moo, Dihlatse di ile tša bea mabaka ka gore ge e ba ditatofatšo tša motšhotšhisi wa Samara e le therešo—gore di be di fihlile dipuku le dipukwana tšeo di thibetšwego ke molao—gona kotlo yeo e be e sa swanela ka ge di dirile molato o monyenyane. Go fihla dipuku le dipukwana tšeo di thibetšwego ke go tshela molao, le gona mokgatlo wa bodumedi wo o dirago bjalo o ka lefišwa goba mediro ya ona ya thibelwa ka nakwana, e sego gore mokgatlo woo o fedišwe. Lega go le bjalo, Kgorokgolo ya Tsheko e ile ya phaela ka thoko mabaka ao.

Go fedišwa ga Mokgatlo wa Bodumedi wa Dihlatse tša Jehofa tša Samara go swana le seo se diregilego toropong ya Taganrog, moo Kgoro ya Tsheko ya Seleteng sa Rostov e ilego ya fediša Mokgatlo wa Bodumedi wa Dihlatse tša Jehofa ka 2009 ka baka la ditatofatšo tša gore o fišegela bodumedi ka mo go fošagetšego. Ka morago, bahlankedi ba tiišetšo ya molao ba Taganrog ba ile ba bolela gore kahlolo yeo ya go thibela mediro ya Dihlatse tša Jehofa lefelong leo ga e molaong. Dihlatse tše 16 tša Taganrog di ile tša bonwa molato ka 2013 ka go fo dira mediro ya tšona ya bodumedi, e lego selo seo se dirwago ke Dihlatse tša Jehofa lefaseng ka moka, go akaretša le Samara. Kgoro e ile ya lefiša Dihlatse tše šupa tšhelete e ntši; tše nne tša tšona e lego banna bao ba hlokomelago phuthego, ba ile ba ahlolelwa go ya kgolegong ka nako e telele. Lega go le bjalo, moahlodi o ile a phumola tefišo ye ka ge nyakišišo le tsheko ya molato wo e ile ya feta nako yeo e beilwego, gomme a ba nea dikotlo tšeo di fegilwego. Dihlatse di ile tša dira boipiletšo kgahlanong le ditatofatšo tše, gomme ka December 12, 2014, Kgoro ya Tsheko ya Seleteng sa Rostov e ile ya laela gore molato o sekwe lefsa go dirišwa moahlodi yo mongwe.

Dihlatse tša Jehofa tše 1 500 tšeo di dulago seleteng sa Samara ga bjale di kotsing ya go bonwa molato wa bosenyi ka baka la go dira mediro ya tšona ya bodumedi. Na se se tla feleletša kae? Balaodi ba Russia ba dira dinyakišišo tše di swanago ka Mekgatlo ya Bodumedi ya Dihlatse dikarolong tše di fapafapanego tša naga yeo. Taba ya gore kgatelelo ye e tla kgoma bjang Dihlatse tše ka bago tše 180 000 tšeo di dulago Russia, e tla ya le masa. Lega go le bjalo, kahlolo ya Kgorokgolo ya Tsheko e bea Dihlatse tša Jehofa kotsing gomme e amoga tšona le madumedi a mangwe a Russia tokologo.