Lefapha la Toka la Russia le rometše lengwalo Kgorong ya Tsheko e Phagamego le nyaka gore go tsebje gore “mokgatlo wa bodumedi le Ofisi e Kgolo ya Dihlatse tša Jehofa di dira mediro e kotsi kudu, le gore mediro ya tšona e thibelwe le go fedišwa.” Ka di-15 tša March 2017, Kgoro ya Tsheko e Phagamego e tsebišitše wepesaeteng ya yona gore e hweditše lengwalo leo. Ka moragonyana ga moo, Ofisi e Kgolo ya Dihlatse tša Jehofa ya Russia e ile ya tsebišwa gore Kgoro ya Tsheko e Phagamego e tla bona gore e dira eng ka taba ya go thibela mediro ya Dihlatse tša Jehofa nageng yeo gomme go rulagantšwe gore molato woo o sekwe ka di-5 tša April 2017, ka 10:00 mesong.

Ge Kgoro ya Tsheko e Phagamego e ka ema le Lefapha la Toka, gona Dihlatse tša Jehofa di tla ba mathateng a magolo kudu Russia. Dihlatse di ka loba meago yeo e dirišetšwago go rapela Modimo, mekgatlo ya tšona ya semolao e ka bago e 400 e ka fedišwa, gomme Dihlatse tša ka godimo ga tše 170 000 di ka bonwa molato wa bosenyi feela ka gobane di bokana gotee, di bala Beibele gotee goba di botša ba bangwe ka ditumelo tša tšona.

Vasiliy Kalin, yo e lego moemedi wa Ofisi e Kgolo ya Dihlatse tša Jehofa kua Russia, o itše: “Hlatse e nngwe le e nngwe ya Jehofa Russia e duma feela gore e kgone go hlankela Modimo e sa tshwenywe ke motho. Go šetše go fetile mengwaga ya ka godimo ga e 100 mmušo wa Russia o sa latele melao yeo o e beilego, yeo e re neago tokelo ya go hlankela Modimo re sa šitišwe ke selo. Ke be sa le yo monyenyane ge Mopresidente Stalin a be a romela lapa la gešo Siberia feela ka gobane re le Dihlatse tša Jehofa. Go a nyamiša e bile go kweša bohloko gore bana ba ka le ditlogolo tša ka di swanetše go lebeletšana le boemo bjo nna ke fetilego go bjona. Ga sa nka ka lora gore ka letšatši le lengwe mmušo wa Russia o tla tlaiša bodumedi bja rena gape.”