Ka di-25 tša May 2017, maphodisa ao a bego a itlhamile ao a šomago lefapheng leo le kgethegilego la Federal Security Service (FSB) a ile a šitiša diboka tšeo di swarwago beke le beke tša bodumedi tša Dihlatse tša Jehofa toropong ya Oryol kua Russia. Mmušo o ile wa latofatša Dihlatse tša Jehofa ka ge o be o re di tšwela pele ka go dira mediro yeo go thwego e kotsi kudu. Ka di-14 tša June 2016, mmušo woo o ile wa tswalela mokgatlo wa bodumedi wa Dihlatse toropong ya Oryl ka ge o be o latofatšwa ka gore o dira mediro e kotsi kudu. Go oketša moo, maphodisa a ile a ngwala ditaba ka botlalo mabapi le batho ka moka bao ba bego ba le dibokeng tša Bokriste, a ba tšeela didirišwa tša bona tša elektroniki, ke moka ka morago ga moo a ya go phuruphutša magae a bona.

Maphodisa a ile a iša banna ba phuthego ya Oryol diofising tša FSB gomme a golega Dennis Christensen yo a tšwago Denmark, yo e lego mogolo phuthegong yeo. Ramolao o ile a dira kgopelo ya ka pejana Kgorong ya Tsheko ya Sovietsky gore Morena Christensen a letele letšatši la tsheko a le kgolegong e le gore maphodisa a FSB a hwetše bohlatse le dihlatse gore a kgone go tšwetša pele molato woo o butšwego. Moahlodi Svetlana Naumova o ile a dumelelana le kgopelo yeo, ke moka a laela gore Morena Christensen a dule kgolegong dikgwedi tše pedi a emetše letšatši la tsheko. Kgopelo ya gore Morena Christensen a se dule kgolegong e tlo dirwa lehono. Go ya ka Article 282.2, part 1, ya Molao wa Disenyi, ge a ka bonwa molato, a ka no golegwa mengwaga e tshelela go ya go e lesome.

Dihlatse tša Jehofa tša Oryl di be di bokane bakeng sa borapedi bja tšona e le sehlopha, ga se mokgatlo wa bodumedi. Dilo tše di dirwago ke mmušo wa Russia di bontšha gore ge e le gabotse o nyaka go hlasela borapedi bja Dihlatse tša Jehofa e sego feela mekgatlo ya bjona. Se se swana le seo se ilego sa diragalela Dihlatse tša toropong ya Taganrog, moo mmušo o ilego wa thoma pele ka go tswalela mokgatlo wa bodumedi wa Dihlatse gomme ka morago wa latofatša ditho tše 16 tša phuthego ya moo ka gore di dira mediro e kotsi kudu ka ge di tšwela pele di bokana bakeng sa borapedi bja tšona. Ka November 2015, Dihlatse tšeo tše 16 di ile tša golegwa, eupša kgoro ya emišanyana ka go di ahlola le go di faena. Ga bjale Kgoro ya Yuropa ya Ditshwanelo tša Batho e sa lekola molato wa Dihlatse tšeo.