Ka di-12 tša April 2017, e be e le letšatši la bone la ge Kgorokgolo ya Tsheko e tšwetša pele molato wa mabapi le go thibelwa ga modiro wa Dihlatse tša Jehofa kua Russia. Boramolao bao ba emelago Ofisi e Kgolo ya Dihlatse tša Jehofa, ba ile ba bolela gore molato woo o butšwego ke Lefapha la Toka o lwantšhana le molao woo naga ya Russia e dirilego tumelelano le ditšhaba tše dingwe ka wona le molaotheo wa Russia.

Boramolao bao ba ile ba bolela gore taba ya gore Lefapha la Toka le boletše gore modiro wa Dihlatse tša Jehofa o thibelwe, e lwantšhana le melao yeo e dirišwago dinageng tše dingwe. Melao yeo e akaretša, Tumelelano ya Yuropa le Kgwerano ya Ditšhabatšhaba ya Ditokelo tša Selegae le tša Dipolotiki. Molaotheo wa Russia gotee le melao yeo, e kgonthišetša gore batho ba swanetše go ba le tokologo ya bodumedi, ba bolele ka bodumedi bja bona ka tokologo gaešita le go bokana ka tokologo (ba be le tokelo ya go ba le mekgatlo ya bodumedi ya semolao).

Dihlatse tša Jehofa tše nne di ile tša nea bohlatse bja gore diphuthego tša tšona ga di diriše dikgatišo tše di lego kotsi kudu tšeo di thibetšwego nageng yeo le gore mediro ya tšona ga e kotsi. Kgoro ya Tsheko e ile ya tsebiša gore molato o tla tšwela pele ka di-19 tša April 2017, ka iri ya lesome mesong.