Kgorokgolo ya Tsheko ya Russia e tšwetše pele ka letšatši la boraro la go seka molato kgahlanong le go thibelwa ga mediro ya Dihlatse tša Jehofa tša Russia. Gare ga bao ba neilego bohlatse, e bile balaodi ba babedi ba Ofisi e Kgolo bao ba emetšego molato wo o butšwego ke Lefapha la Toka kgahlanong le Dihlatse tša Jehofa.

Sergey Cherepanov o ile a se dumelelane le ba Lefapha la Toka ge ba be ba laela Ofisi e Kgolo ya Dihlatse tša Jehofa gore e tlogele go dira mediro e kotsi kudu yeo e lwantšhanago le molao wa naga. Lega go le bjalo, ba Lefapha la Toka ga se ba ka ba hlalosa gabotse gore ba Ofisi e Kgolo ba lwantšhana le molao bjang goba gore ba dire eng gore ba se sa dira mediro e kotsi kudu. Molaodi yo mongwe wa Ofisi e Kgolo e lego Vasiliy Kalin, o hlalositše gore Ofisi e Kgolo e be e dutše e šoma ka mengwaga e 26, ke moka a botšiša gore: “Re thomile neng go dira mediro e kotsi kudu?” O okeditše ka gore Dihlatse tša Jehofa ga se tša fetoga—di sa theetša balaodi e bile ka mehla di phela ka melao yeo e kgothaletšago khutšo. O hlalositše gore o tshwenyegile ka taba ya gore Dihlatse tša Jehofa di šetše di thomile go tlaišwa.

Moahlodi o hlalositše gore molato o tla tšwela pele ka di-12 tša April 2017 ka iri ya lesome mesong.