Ka di-9 tša February 2017, Kgorokgolo ya Tsheko ya Russia e dirile phetho ya go fediša Mokgatlo wa Bodumedi bja Dihlatse tša Jehofa wa Birobidzhan (Local Religious Organization [LRO]). Kgorokgolo yeo e ile ya dumelelana le phetho ya kgoro ya Birobidzhan ya gore LRO ye, e dira mediro e kotsi le gore mediro ya yona ya bodumedi e fedišwe.

Phetho yeo e theilwe bohlatseng bja maaka. Ka February 2015 le ka January 2016, maphodisa a ile a bea dikgatišo tša bodumedi tšeo di thibetšwego nageng ye lefelong leo Dihlatse tša Jehofa di le rentilego go swarela diboka tša tšona tša bodumedi. Ka morago wona maphodisa a, a ile a tla a itira eka a di hweditše moo. Ka January, maphodisa ao a aperego dilo tša go khupetša difahlego a ile a šitiša seboka sa bodumedi gomme a bea dipuku tša bodumedi ka tlase ga setulo batho ba le gona.

Mokgatlo wa LRO kua Birobidzhan, wo o lego tikologong e kgethegilego ya Bajuda kua Russia, ke mokgatlo wa mathomo wa go fedišwa ga e sa le Kgoro ya Tsheko ya Moscow e ntšha kahlolo ya gore phetho yeo e bego e dirilwe ke Moahlodi yo Mogolo ya mabapi le go tswalelwa ga meago ya rena ya ofisi ya lekala e swanetše go latelwa.