Ka July 30, 2014, Kgoro ya Tsheko ya Taganrog e bone Dihlatse tša Jehofa tše 7 tša tše 16 molato le go di ahlolela kgolego ka baka la go rulaganya le go ya dibokeng tša tšona tša bodumedi tšeo di nago le khutšo. Di bonwe molato feela ka ge di dira mediro ya tšona ya bodumedi yeo e dirwago ke Dihlatse tša Jehofa lefaseng ka bophara. Phetho ye e bea mohlala o kotsi wa go thibela tokologo ya bodumedi bja Dihlatse tša Jehofa nageng ka moka ya Russia.

Moahlodi o be a swanetše go ba a dirile phetho ya gagwe ka di 28 tša July 2014, eupša o ile a fega molato wo go fihlela letšatšing le le latelago. Ka di 29 tša July, moahlodi o ile a bala phetho ya matlakala a 100 letšatši ka moka gomme phetho yeo ya be ya tšwela pele go fihla mesong ya di 30 tša July. O ile a ahlolela kgolego bagolo ba bane ba phuthego mengwaga e mehlano go ya go e mehlano le seripa le go ba lefiša di-ruble tše 100 000 (R29 900). O ile a ba a lefiša yo mongwe le yo mongwe wa Dihlatse tše tharo tša tšela tše šupa tšeo go boletšwego ka tšona di-ruble tše 50 000 go ya go tše 60 000 (R14 900 go R18 100). Moahlodi o ile a phumola tšhelete ka moka yeo a e lefišitšego Dihlatse tše ka ge dinyakišišo tša molato wo le tsheko ya wona e šetše e fetilwe ke nako yeo e beilwego, moahlodi o ile a phumola kahlolo ya gagwe ya go di iša kgolegong. Molato wa Dihlatse tše senyane tše di šetšego o ile wa phumolwa.

Moahlodi o ile a dira phetho ya gagwe a ithekgile ka kahlolo yeo e dirilwego ke Kgoro ya Tsheko ya Selete ya Rostov yeo e dirilwego ka September 2009 ya go tswalela Mokgatlo wa Bodumedi wa Dihlatse tša Jehofa kua Taganrog. Le ge kahlolo ya 2009 e be e le mabapi le mokgatlo wa molao wa Dihlatse, moahlodi o ile a bolela gore mediro ka moka ya Dihlatse tša Jehofa kua Taganrog le dileteng tša kgauswi e thibetšwe.

Nakong ya tsheko ye e tšerego dikgwedi tše 15, bagolegwa ba ba ile ba bolela gore ba ka se latole tumelo ya bona le gore ba tla tšwela pele e le Dihlatse tša Jehofa. Bao ba bonwego molato, ba ikemišeditše go tšwela pele ka mediro ya bona ya bodumedi le ge seo se ka dira gore ba golegwe e le disenyi tšeo di sa itsholego.

Victor Zhenkov, yo e lego yo mongwe wa boramolao molatong wo o re: “Ke kwa ke tšhošwa ke seo phetho ye e ka se bolelago nakong e tlago go Dihlatse tša Jehofa mo Russia. Balaodi ba tiišetšo ya molao mo Taganrog le Russia ka moka ba ka tla ba diriša phetho ye lesolong la maaka la go tšwela pele ba tshwenya le go tlaiša Dihlatse tša Jehofa ba di tšhošetša ka go di golega feela ka baka la tumelo ya tšona.”

Dihlatse kua Taganrog di dirile boipiletšo Kgorong ya Tsheko ya Selete ya Rostov ka phetho ye.