FEBRUARY 27, 2015
UNITED STATES
Dihlatse di Thopa Difoka tše Dikgolo ka ge di Agile Meago Yeo e sa Senyego Tikologo
NEW YORK—Dihlatse tša Jehofa tšeo di tsebjago kudu ka modiro wa tšona wa go ruta Beibele lefaseng ka bophara, di thopile difoka ka ge di agile meago yeo e sa senyego tikologo.
Mokgatlo wa Green Building Initiative (GBI) wo o kgothaletšago go aga meago yeo e sa senyego tikologo o neile ofisi ya lekala la Wallkill, New York disetifikeiti tša meago e mebedi ya lekala le, e lego Moago wa Bodulo wa F wo o lego Watchtower Farms, wo o fedilego mafelelong a ngwaga wa 2012 gotee le Moago wa Diofisi wa Wallkill wo o fedilego ka 2014. Meago ye ka bobedi e thopile sefoka sa maemo a godimo sa Four Green Globes, e lego lenaneo la go hlahloba ge e ba meago e sa senye tikologo.
Moago wa Diofisi tša Wallkill
Shaina Sullivan, e lego Molaodimogolo wa Lefapha la Dipapatšo wa GBI, o re: “Lefaseng ka bophara ke meago e sego kae yeo e hlahlobilwego lenaneong la go aga meago yeo e sa senyego tikologo yeo e thopilego sefoka sa maemo a godimo sa Four Green Globes.” Moh. Sullivan o okeditše ka gore Moago wa Diofisi tša Wallkill “ke diofisi tša mathomothomo New York State tša go hwetša sefoka se sa maemo a godimo.” Jenna Middaugh, Molaodi wa mokgatlo wa GBI, o boletše gore: “Go meago ka moka e 23 [ya mo United States] yeo e kilego ya newa sefoka sa Four Green Globes go tloga ka 2006, Moago wa diofisi wa Wallkill o hweditše dipoelo tša godimo ka diperesente tše 94.”
Moago wa Bodulo wa F wo o lego Watchtower Farms
Mokgatlo wa GBI o diriša lenaneo la Green Globes go hlahloba meago le go nea disetifikeiti ka go romela motho yo a tlago go hlahloba go bona ge e ba e agilwe ka tsela yeo e sa senyego tikologo. Bakeng sa go hwetša sefoka sa Green Globes go nyakega gore meago e agwe ka tsela yeo e tlago go seketša go dirišwa ga meetse, go fokotša go dirišwa ga mohlagase, go se šilafatše moya, go fokotša go diriša dilo tša tlhago ka go kgetha dilo tša maleba tša go aga le meago yeo e tsenyago moya gabotse.
Di-solar tšeo di tlago go tšweletša diperesente tše 10 tša mohlagase di diriša letšatši Moagong wa Diofisi wa Wallkill, e lego se sengwe seo se dirilego gore moago wo o thope sefoka.
David Bean, mookamedi wa modiro wa go aga meagong ya Dihlatse United States, o re: “Go thopa difoka tše ke bohlatse bja gore re diriša dilo tša maemo a godimo medirong ya rena ka moka ya go aga. Re sa dutše re diriša mokgwa wo go aga ntlokgolo ya rena ya Warwick, New York.”
Go bjala godimo ga marulelo, e lego selo seo Dihlatse di se dirago ga bjale ntlongkgolo ya tšona ya lefase ka bophara ya Warwick, New York.
Zeny St. Jean, yo a okamelago mediro ya go aga lefaseng ka bophara ya Dihlatse tša Jehofa o boletše gore: “Le ge modiro wa rena o mogolo e le go ruta Beibele, re thabela difoka tše ka ge di bontšha gore ditsebi tša tikologo di lemoga gore re katanela go aga meago yeo e sa senyego tikologo lefaseng ka bophara.”
Ba Ditaba:
Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000