KUA New York, ka morago ga gore Dihlatse tša Jehofa di fetše dikgwedi tše tshela di mpshafatša lefelo la tšona, di ile tša bula lefsa lefelo leo la histori leo le bitšwago Stanley Theater kua Jersey City, New Jersey, ka April 13, 2013. Ke kgale Dihlatse di diriša Stanley Theater e le Holo ya Dikopano bakeng sa diboka tše dikgolo tša go ithuta Beibele ka nywaga e 30. Go mpshafatšwa ga lefelo le go dirile gore Stanley Theater e fetošwe lefelo leo go ithutelwago Beibele mahala.

Madulo a yona a fetošitšwe gore batho ba 250 000 ba kgone go dudišega botse ge ba eba gona dibokeng tša ngwaga le ngwaga lefelong le. Bogolo bja holo le diphapoši tša ka thoko di tsentšwe tshepedišo ya bidio ya moragorago yeo e hlametšwego kudu go dirišwa ke ba Polelo ya Diatla ya Amerika.

Bogolo bja mošomo wo bo phethilwe ke Dihlatse tša Jehofa tšeo di ilego tša ithaopela go šoma modirong wo. Baithaopi ba be ba etšwa dikarolong tše di fapafapanego tša United States go tlo thuša go kaonefatša moago wo wa kgale wo o nago le histori ya moswananoši.

Ga e sa le go tloga ka bo-1920 Stanley Theater e le kua New Jersey. E be e le lengwe la mafelo a magolo a go bogela difilimi ao a kilego a agwa kua United States. Lefelo le le ile la swanelwa ke go tswalelwa ka 1978, eupša ka 1983, Dihlatse tša Jehofa di ile tša reka lefelo le la histori gomme tša le lokiša. Dihlatse di be di dutše di diriša lefelo le e le lefelo la go ithuta Beibele ga e sa le le bulwa ka 1985.

Ge mmoleledi wa Dihlatse tša Jehofa e lego J. R. Brown, a bolela ka mpshafatšo yeo e sa tšwago go dirwa, o re: “Ge e le gabotse Stanley Theater e lebelelwa e le lefelo la borapedi, moo batho bao ba tšwago malemeng a fetago a 15 ba ka tlago ba ithuta Beibele. E bile lefelo le le ratwa ke badudi ba New Jersey gomme mokgatlo wa rena o thabela go diriša lefelo le la histori.”

Ba Ditaba:

Bakeng sa Ditšhabatšhaba: J. R. Brown, Ofisi ya Ditaba tša Boditšhaba, mogala +1 718 560 5000