NEW YORK—Ka June 20-22 le June 27-29, 2014, Dihlatse tša Jehofa di be di tletše Lepatlelong la MetLife Bohlabela bja Rutherford kua New Jersey, Dikopanong tša Ditšhabatšhaba tša “Tšwelang Pele le Tsoma Mmušo wa Modimo Pele!” moo mananeo a bego a swerwe ka Seisemane le Sepanishi.

Dikopano tše tše pedi e bile tše dikgolo kudu tšeo di kilego tša swarwa ditoropong tša New York mengwageng e masome e fetilego, moo palomoka ya bao ba bilego gona e bilego ka godimo ga 118 000. Batho ba fetago 407 000 bao ba bego ba le ditorotswaneng tše dingwe ba be ba kgokagantšwe ka bidio go theetša dikarolo tše dingwe tša lenaneo, gomme palomoka ya bao ba bilego gona ge e kopantšwe e bile ka godimo ga 525 500.

Dikarolo tše dintši tša lenaneo di be di na le ditiragatšo le dibidio tšeo di bontšhago kamoo melao ya motheo ya Beibele e ka dirišwago ka gona. Letšatšing le lengwe le le lengwe, lenaneo la kopano le be le phethwa ka polelo ya setho sa Sehlopha se Bušago sa Dihlatse tša Jehofa. David Splane o neile dipolelo ka June 20-22 mola Geoffrey Jackson a di neile ka June 27-29.

Kopanong e nngwe le e nngwe go be go e na le bao ba kolobetšwago. Batho ba 1 255 ba kolobeditšwe lepatlelong leo, gomme ba bangwe ba 2 930 ba kolobeditšwe dikopanong tšeo di bego di kgokagantšwe ka bidio gomme palomoka ya bao ba kolobeditšwego e bile 4 185.

Bao ba bilego gona ba akaretša baeng bao ba bego ba laleditšwe go tšwa Argentina, Australia, Belize, Brithania, Chile, Costa Rica, El Salvador, Jeremane, Gerika, Guatemala, Honduras, Italy, Malaysia, Mexico, Nicaragua, Panama, Peru, Sepania le Venezuela.

J. R. Brown, e lego mmoleledi wa Dihlatse tša Jehofa o boletše gore: “Tiragalo ye e gopoditše ba bantši ba rena ka kopano ya bohlokwa historing yeo e ilego ya swarwa morago kua New York ka 1958. Batho ba fetago 253 000 ba ile ba ba gona Lepatlelong la Yankee le leo le kilego la ba gona la Polo. Dikopano tšeo di swaretšwego Lepatlelong la MetLife ngwageng wo e bile tiragalo e bohlokwa historing ya Dihlatse tša Jehofa.”