FORT LAUDERDALE, Fla.—Ka November 14, 2014, sehlopha sa bafetoledi ba Polelo ya Diatla ya Amerika sa Dihlatse tša Jehofa se ile sa hudušwa Lefelong la Thuto la Watchtower Patterson, New York go ya toropong ya Fort Lauderdale, Florida. Dihlatse tše di be di dutše di fetolela Beibele, dipuku le dipukwana le dibidio tšeo di theilwego Beibeleng ka Polelo ya Diatla ya Amerika diofising tša Patterson go tloga ka 1995. Dikgweding tše mmalwa tšeo di fetilego, Dihlatse di ile tša oketša lefelo le la Fort Lauderdale ka go aga diofisi le lefelo la go gatiša. Ka May 2015, ofisi ya bofetoledi ya Polelo ya Diatla ya Amerika e be e šetše e šoma.

Dihlatse di dirile gore dibidio tša Polelo ya Diatla ya Amerika di hwetšagale Wepesaeteng ya jw.org gaešita le go di-DVD. Ka mehla di diriša dibidio tše dibokeng tšeo di swarwago beke le beke diphuthegong tše fetago 500 lefaseng ka bophara le ditiragalo tše di swanago le dikopano tše dinyenyane le tša selete.

Jonathan Galvez, yo a šomago le sehlopha sa bafetoledi sa Polelo ya Diatla ya Amerika ofising ya Florida o boletše gore: “Morero wa rena ke go kgonthišetša gore batho ba bantši bao ba dirišago Polelo ya Diatla ya Amerika ba kwešiša dibidio tša rena gabonolo, go sa šetšwe gore ba tšwa nageng efe goba ba rutegile go fihla kae. O tšwetše pele ka gore: “Go na le dinaga tše 45 tšeo di dirišago Polelo ya Diatla ya Amerika, gomme go swana le polelo e nngwe le e nngwe, difoa le tšona di šomiša mebolelo e fapafapanego go ya le ka dinaga. Ka ge re na le ofisi Fort Lauderdale, bafetoledi ba rena ba dikaneditšwe ke batho ba bantši bao ba fapafapanego bao ba dirišago Polelo ya Diatla ya Amerika.”

Ka 2014, Frank Bechter, yo a ithutilego tsela yeo batho ba phelago ka yona, ditšo tša bona le maleme a bona, o ile a ya kopanong ya selete ya Dihlatse tša Jehofa ya Polelo ya Diatla ya Amerika toropong ya Richmond, Virginia, e le karolo ya nyakišišo yeo a bego a e dira ka difoa, polelo ya tšona ya diatla le tsela yeo di phelago ka yona. Dr. Bechter o boletše gore: “Tsela yeo mokgatlo wa lena o fetolelago Polelo ya Diatla ka gona le kamoo dipolelo di newago ka yona ke ya maemo a godimo gomme se se bonagetše botse kopanong ya Richmond, kudukudu tsela yeo le bego le diriša dibidio tša Beibele tšeo di fetoletšwego le tšeo di lokišeditšwego gabotse. Tsela yeo le fetolelago Polelo ya Diatla ya Amerika ka yona ke e kgahlišago. Ke leboga maiteko a Dihlatse a go fetolela Beibele ka bokgwari ka Polelo ya Diatla ya Amerika, ka ge ye e le puku ya bohlokwa kudu setšhabeng le historing ya lefase. Ke dumela gore go swana le batho ba bangwe difoa le tšona di swanetše go hwetša dipuku tša bohlokwa tšeo di kgonnego go hlahla lefase.”

Dihlopha tša bafetoledi ba Dihlatse tša Jehofa lefaseng ka bophara di tšweleditše le go aba dibidio tše dintši ka dipolelo tša diatla tše ka bago 80 mahala. Dihlatse tša Jehofa di tšweleditše gape le lenaneo la Polelo ya Diatla la JW Library Sign Language leo o ka kgonago go taonelouta, go rulaganya le go bapala dibidio ka polelo ya diatla go jw.org.

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000