Dihlatse tša Jehofa di šoma gore di thuše badumedigotee le tšona le ba bangwe bao ba wetšwego ke kotsi ya mafula a ledimo le legolo leo le bitšwago Matthew, leo le ilego la hlasela dihlakahlaka tša Bahamas, tša Caribbean le borwabohlabela bja United States mathomong a October 2016.

Mo e ka bago seripagare sa Dihlatse tša Jehofa tše 1 400 kua Bahamas di wetšwe ke kotsi ya mafula a ledimo le legolo. Dijo, meetse le dilo tše dingwe tša bohlokwa di ile tša romelwa mafelong a mabedi gore go hlokomelwe dinyakwa tša Dihlatse tšeo.

Kua Cuba, magae a 124 a Dihlatse a ile a senyega kudu gomme a 31 ga a sa le gona.

Dihlatse tša ka godimo ga tše 700 kua Haiti di ile tša šala di se na mo di dulago ka baka la mafula a ledimo le legolo. Magae a Dihlatse a 73 le mafelo a mane a borapedi di ile tša senyega kudu. Magae a mangwe a 274 gotee le mafelo a mangwe a borapedi a 15 di ile tša senyega. Batho bao ba kgomilwego ke kotsi yeo ba ile ba newa dijo le dihlare gomme bao ba se nago madulo ba ile ba rekelwa ditente tša go dula ka nakwana.

Kua United States, mafula a ledimo le legolo a ile a senya magae a 125 a Dihlatse. Dipego di bontšha gore tshenyo e kgolo e bakilwe ke meetse ao a tšwago dinokeng tšeo di tletšego wa go falala ka baka la mafula.

Sehlopha se Bušago sa Dihlatse tša Jehofa se rulaganya modiro wa tlhakodišo se le ntlongkgolo ya rena go dirišwa meneelo ya modiro wa lefase ka moka wa Dihlatse. Seboleledi sa Dihlatse tša Jehofa e lego David A. Semonian, o re: “Le ge go se na Dihlatse tše di hlokofetšego, re kwela bohloko bao ba hlokofaletšwego ke baratiwa ba bona kotsing ye.”

Ba Ditaba:

Bakeng sa Dinaga tše Dingwe: David A. Semonian, Ofisi ya Ditaba tša Setšhaba, 1-718-560-5000

Bahamas: Maxwell Dean, 1-242-422-6472

Haiti: Daniel Lainé, 509-2813-1560