Go gobošwa ka thobalano go akaretša mohuta o mongwe le o mongwe wa thobalano wo o sa o nyakego—go akaretša go kgwathwa le dipolelwana tša thobalano. Eupša ka dinako tše dingwe go ka ba thata go bona phapano magareng ga metlae, go bapala ka lerato le go gobošwa ka thobalano.

 Na o tseba phapano magareng ga tšona? Diriša  molekwana wa go gobošwa ka thobalano wo re o dirilego gomme o hwetše dikarabo!

 Ka maswabi, go gobošwa ka thobalano ga go kgaotše ge o fetša sekolo. Lega go le bjalo, ge o ka ba le sebete le bokgoni bja go lebeletšana le go gobošwa ka thobalano gona bjale, o tla kgona go lebeletšana le go gobošwa ka thobalano mohla o šoma. E bile o ka kgona go emiša motho yo a tlwaetšego go goboša batho ka thobalano pele a gobatša ba bangwe!

 O ka kgona go thibela go gobošwa ka thobalano ge o tseba gore ge e le gabotse seo ke eng le kamoo o ka lebeletšanago le sona ka gona! Ela hloko maemo a mararo le kamoo o ka lebeletšanago le bjo bongwe le bjo bongwe bja ona.

 BOEMO:

“Ge ke le mošomong, banna ba bangwe bao ba bego ba mpheta ka bogolo ba be ba dulela go mpotša gore ke yo mobotse gomme ba re ba duma gore nkabe e le ba banyenyane ka nywaga e 30. Yo mongwe o ile a ba a sepela ka morago ga ka gomme a dupelela moriri wa ka!”—Tabitha wa nywaga e 20.

 Tabitha a ka nagana gore: ‘Ge nka mo hlokomologa gomme ka kgotlelela boemo bjo, mohlomongwe o tla kgaotša.’

 Lebaka leo seo se ka se thušego: Ditsebi di re ge batho bao ba gobošwago ka thobalano ba ka hlokomologa seo, gantši se tšwela pele gomme sa mpefala.

 Gona leka se: Ipolelele gomme ka moya o boleta eupša o tiišitše ka ganong, o botše mogoboši gore o ka se kgotlelele mantšu goba boitshwaro bja gagwe. Taryn wa nywaga e 22 o re: “Ge motho yo mongwe a ka nkgwatha ka tsela e gobogilego, ke a retologa gomme ka mmotša gore e be la mafelelo. Seo gantši se tšhoša masogana.” Ge e ba mogoboši a phegelela, tia gomme o se ngale. Ge Beibele e eletša ka go kgomarela ditekanyetšo tše di phagamego tša boitshwaro, e re: “Tia, bontšha gore o godile gomme o be le sebete.”—Bakolose 4:12, The New Testament in Contemporary Language.

 Go thwe’ng ge e ba motho yo a go gobošago a go tšhošetša ka gore o tla go gobatša? Ge go le bjalo, o se ke wa mo tšhošetša. Itshepelele ka pela kamoo go ka kgonegago gomme o tsome thušo ya motho yo mogolo yo o mmotago.

 BOEMO:

“Ge ke be ke le mphatong wa bone, banenyana ba babedi ba ile ba nkgoga ge ke be ke iphetela. Yo mongwe wa bona o be a ratana le banenyana gomme o be a nyaka go ratana le nna. Le ge ke ile ka gana, ba ile ba tšwele pele go nkgoboša ka mehla ge re fetoša diklase. Ka letšatši le lengwe ba ile ba ba ba nkgorometša ka thulana le leboto!”—Victoria wa nywaga e 18.

 Victoria a ka nagana gore: ‘Ge nka botša motho yo mongwe ka se, ba bangwe ba tla nagana gore ke lefšega, mohlomongwe ba ka se nkgolwe.’

 Lebaka leo go nagana ka tsela yeo go bego go ka se thuše: Ge o ka se botše motho, mogoboši a ka tšwela pele gomme a ba a goboša le ba bangwe.—Mmoledi 8:11.

 Gona leka se: Nyaka thušo. Batswadi le barutiši ba ka go thuša gore o thibele go gobošwa. Go thwe’ng ge e ba batho bao o ba botšago ba tšeela taba ya gago fase? Leka se: Nako le nako ge o gobošwa, ngwala fase ditaba ka botlalo. Ngwala letšatši, nako le lefelo leo seo se diragetšego go lona, gotee le seo mogoboši a se boletšego. Ke moka o nee motswadi goba morutiši kopi ya seo o se ngwadilego. Batho ba bantši ba tšeela godimo taba e ngwadilwego go feta ge ba ekwa ka molomo.

 BOEMO:

“Ke be ke tloga ke tšhaba mošemane yo mongwe yo a bego a bapala rugby. E be e le yo motelele kudu e bile e le senatla sa go imela dikhilograma tše 135! O be a ipoditše gore ka letšatši le lengwe o tla robala le nna. O be a dulela go ntlaiša—a ntlaiša ngwaga ka moka. Ka letšatši le lengwe ke ile ka ikhwetša ke šetše le yena feela ka klaseng gomme o ile a thoma go mpatamela. Ke ile ka taboga ka kitimela mojako.”—Julieta wa nywaga e 18.

 Julieta a ka nagana gore: ‘E fo ba e le mokgwa wa bašemanyana.’

 Lebaka leo seo se ka se thušego: Motho yo a go gobošago a ka se fetoše mokgwa wa gagwe ge batho ka moka ba ka nagana gore seo a se dirago ga se phošo.

 Gona leka se: Gana teko go ena le go e tšea ga bohwefo goba go myemyela. Goba kgonthišetša gore tsela yeo o arabelago ka yona—go akaretša le ponagalo ya gago ya sefahlego—e bontšha motho yo a lekago go go goboša gore ya gagwe taba ga o e tšee.

 KANEGELO YA KGONTHE 1:

“Ga ke rate go swara batho makgwakgwa. Ka gona le ge masogana a be a leka go nkgoboša, ke be ke a botša gore a kgaotše—eupša ke be ke sa tiiše ka ganong gomme gantši ke be ke myemyela ge ke bolela le ona. A be a nagana gore ke bapala ka lerato.”—Tabitha.

•   Ge nkabe o le Tabitha, o be o tla lebeletšana bjang le batho bao ba go gobošago? Gona ka baka la’ng?

•   Ke’ng seo se ka dirago gore motho yo a go gobošago a nagane gore o bapala ka lerato?

 KANEGELO YA KGONTHE 2:

“Se se thomile ge bašemane ba bangwe ba bolela mantšwana a mmalwa a go tšwa tseleng ge ke be ke le ka klaseng ya go ithuta tša maphelo. Ke ile ka ba hlokomologa ka dibeke tše mmalwa, eupša dilo di ile tša mpefala. Bašemane ba ba ile ba thoma go dula kgauswi le nna gomme ba nkgokarela. Ke ile ka ba kgorometša eupša ba se kgaotše. Mafelelong, yo mongwe wa bona o ile a nnea pampišana e nago le molaetša o gobogilego. Ke ile ka e iša go morutiši. Mošemane yoo o ile a rakwa sekolong. Ke ile ka lemoga gore nkabe ke ile ka ya go morutiši go tloga mathomong!”—Sabina.

•   nagana gore ke ka baka la’ng Sabina a ile a kgetha go se ye go morutiši di sa tloga fase? Na o nagana gore o dirile phetho e botse? Gona ka baka la’ng?

 KANEGELO YA KGONTHE 3:

“Mošemane yo mongwe o ile a ya go moratho wa ka e lego Greg ge a be a le ka ntlwaneng. Mošemane yoo o ile a batamela Greg kudu gomme a re: ‘Ntshune.’ Greg o ile a gana, eupša mošemane yoo a se kgaotše. Ge e le gabotse, Greg o ile a swanelwa ke go mo kgorometša.”—Suzanne.

•   Na o nagana gore Greg o be a gobošwa ka thobalano? Gona ka baka la’ng?

•   nagana gore ke ka baka la’ng bašemane ba bangwe ba dikadika go ikemela ge ba gobošwa ka thobalano ke bašemane ba bangwe?

•   Na o dumelelana le tsela yeo Greg a ilego a lebeletšana le boemo bjo? Wena o be o tla dira’ng?