Beibele ga e re thibele go nwa bjala ka tekanyetšo, ge e ba re dumelelwa ke molao go dira bjalo. Eupša, e gana botagwa.—Psalme 104:15; 1 Bakorinthe 6:10.

Eupša go thwe’ng ge e ba o ikwa o gapeletšega go nwa bjala maemong ao o sa dumelelwego ke molao goba batswadi ba gago?

•  Nagana ka seo se ka diregago ka morago

•  Tseba mo o swanetšego go fihla gona

•  Seo dithaka tša gago di se bolelago

Tše dingwe tša dithaka tša gago di ka bona eka ga go kgonege gore di thabe di se tša nwa bjala. Eupša go ka direga eng ka morago ga go nwa?

• O ka tsena mathateng ka baka la go tshela molao. Go ithekgile ka gore o dula kae, ge o enwa bjala moo go sa dumelelwego ke molao, o ka hwetša thekethe, wa bonwa molato, wa amogwa lengwalo la go otlela, wa dirišwa tirelo e itšego ya setšhaba goba wa golegwa.—Baroma 13:3.

• O ka senyega leina. Bjala bo ka dira gore motho a se be le dihlong. Bo ka go dira gore o bolele goba o dire dilo tšeo o tlago go itsholela tšona ka morago. (Diema 23:31-33) Mehleng ye ya thekinolotši, boitshwaro bja gago bo ka dira gore botumo bja gago bo senyegele sa ruri.

• O ka palelwa ke go ikemela. Bjala bo ka dira gore go be bonolo go gobatšwa ke batho mmeleng goba wa gobošwa ka thobalano. Le gona bo ka dira gore o arošwe ke batho ba bangwe, e lego seo se ka dirago gore o itshware ka tsela e kotsi goba yeo e sego ya swanela.

• O ka lemalela bjala. Banyakišiši ba bangwe ba bontšhitše gore ge motho a thoma go nwa bjala e sa le ngwana go ba thata gore a tlogele ge a godile. Go nwa bjala gore o tloše kgateletšego ya monagano le go lewa ke bodutu, go ka dira gore o bo lemalele.

• O ka hwa. Ngwageng o mongwe, kua United States metsotsong e mengwe le e mengwe e 52 motho o tee o be a ehwa ka baka la dikotsi tšeo di bakwago ke batho bao ba otlelago ba nwele. Megwageng e mengwe e mehlano, batho ba ka godimo ga ba 1 500 bao ba lego ka tlase ga mengwaga e 21 ba ile ba hwa ngwaga le ngwaga ka baka la dikotsi tša dikoloi tšeo di bakwago ke go otlela ba nwele. Le ge o se wa nwa bjala, o ka bea bophelo bja gago kotsing ka go dumela go namela koloi ya motho yo a nwelego.

Ge o tseba e sa le pele seo o tlago go se dira o tla phema dikotsi le ditshenyagalelo tša go nwa o sa swanela.

Molao wa Motheo wa Beibele o re: “Yo bohlale ke yo a bonego kotsi a ikuta.” (Diema 22:3) E ka se be gabohlale go nwa bjala pele o otlela goba o dira mediro e mengwe yeo e nyakago monagano wa gago ka moka.

Seo ke tlago go se dira: ‘Ge e ba ke kgetha go nwa, ke tla dira seo ge e ba ke šetše ke na le mengwaga yeo e dumelelwago ke molao e bile maemo a ntumelela.’

Molao wa Motheo wa Beibele o re: “Le bahlanka ba yoo le mo kwago.” (Baroma 6:16) Ge o enwa bjala feela ka gobane dithaka tša gago di enwa, o dumelela batho ba bangwe gore ba go laole. Ge e ba o enwa bjala gore o itloše bodutu goba o laole kgateletšego ya monagano, ga o ithute dika tšeo o di nyakago go go thuša go swaragana le mathata a gago.

Seo ke tlago go se dira: ‘Nka se dumelele dithaka tša ka di nkgapeletša go nwa bjala.’

Molao wa Motheo wa Beibele o re: ‘O se ke wa ba gare ga bao ba nwago kudu.’ (Diema 23:20) Bagwera ba babe ba ka dira gore o fetoše phetho ya gago ya go se nwe bjala. O ipea kotsing ka go ba le batho bao ba nwago bjala kudu.

Seo ke tlago go se dira: ‘Nka se gwerane le batho bao ba nwago bjala kudu.’