Ge e ba o diriša Inthanete, o ka letela gore neng neng o tla kopana le diswantšho tša batho ba sa aparago. Hayley wa mengwaga e 17 o re: “Ga go nyakege gore o tsomane le diswantšho tše bjalo tšona di tla go latelela.”

 Go bogela diswantšho tša batho ba sa aparago go ka leka le bao ba ikemišeditšego go di phema. Greg wa mengwaga e 18 o re: “Ke be ke ipoditše gore nka se tsoge ke di bogetše, eupša ke ile ka feleletša ke di bogetše. O ka se ipethe sehuba wa re o ka se tsoge o di bogetše.”

 Lehono, diswantšho tša batho ba sa aparago di hwetšagala gabonolo go feta le ge e le neng pele. Le gona, ka ge go romelana melaetša ya thobalano ka founo go atile, bafsa ba bantši ba itirela le go phatlatlatša diswantšho tša bona ba sa apara.

 Therešo e sa fetogego: O lebeletšane le tlhohlo e kgolo yeo batswadi, bomakgolo le borakgolo ba gago ba sa kago ba lebana le yona ge ba be ba lekana le wena. Potšišo e bohlokwa ke gore: Na o ka kgona go itshwara gore o se di bogele?—Psalme 97:10.

 Karabo ke ee—ge e ba o kgetha go dira bjalo. Sa pele o swanetše go kgodišega gore diswantšho tše di fošagetše. Anke re eleng hloko ditaba tše sego kae tša therešo le tša maaka mabapi le sehlogo se.

 Maaka: Diswantšho tša batho ba sa aparago ga di kotsi.

 Therešo: Seo diswantšho tša batho ba sa aparago di se dirago monaganong wa gago ke seo go kgoga go se dirago maswafong a gago. Di a go šilafatša. Diswantšho tše di goboša selo seo Modimo a se dirilego gore se matlafatše tlemo ya sa ruri magareng ga batho ba babedi. (Genesi 2:24) Ge nako e dutše e eya, di ka ba tša dira gore motho a se be le taba ka se se nepagetšego le se se fošagetšego. Ka mohlala, ditsebi tše dingwe di bolela gore go na le kgonagalo e kgolo ya gore banna bao ba dulelago go bogela diswantšho tše ba se be le taba ka go tlaišwa ga basadi.

Beibele e bolela ka batho ba bangwe bao ba ‘lahlegetšwego ke maikwelo ohle a boitshwaro.’ (Baefeso 4:19) Ba hwile matswalo go fihla bokgoleng bja gore ga ba sa kwa bohloko le ge ba dira dilo tše mpe.

 Maaka: Diswantšho tša batho ba sa aparago di ka go ruta ka thobalano.

 Therešo: Diswantšho tša batho ba sa aparago di go ruta go ba le megabaru. Di dira gore o lebelele batho e le dilo feela le gore ba bopetšwe go fo kgotsofatša dikganyogo tša gago tša boithati. Ga go makatše ge nyakišišo e nngwe e ile ya bontšha gore bao ba tlwaetšego go bogela diswantšho tše ga se gantši ba kgotsofatšwa ke thobalano le ge ba le lenyalong.

Beibele e botša Bakriste gore ba pheme “bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru,” e lego dilo moka tšeo diswantšho tše di di kgothaletšago.—Bakolose 3:5.

 Maaka: Bao ba phemago diswantšho tša batho ba sa aparago ga ba rate go bolela ka thobalano.

 Therešo: Bao ba phemago diswantšho tša batho ba sa aparago ba hlompha thobalano. Ba a tseba gore thobalano ke mpho e tšwago go Modimo go matlafatša tswalano ya monna le mosadi bao ba lego lenyalong. Go na le kgonagalo ya gore bao ba nago le pono e swanetšego ka thobalano ba dule ba kgotsofatšwa kudu ke tswalano yeo ka morago ga lenyalo.

  Beibele e bolela phaa ka thobalano. Ka mohlala, e botša banna bao ba nyetšego gore: ‘Ba thabe le basadi ba bofsa bja bona. Ba dule ba thabišwa ke lerato la bona.’—Diema 5:18, 19.

 Go thwe’ng ge e ba o nagana gore teko ya go bogela diswantšho tše e matla kudu go ka di phema? Letlakala la go itekola le rego: “Kamoo o ka Ganago go Bogela Diswantšho tša Batho Bao ba sa Aparago” le ka go thuša.

 Kgodišega gore o ka kgona go phema teko ya go bogela diswantšho tše. O ka kgona go tlogela go di bogela ge e ba o šetše o thomile. O ka holega kudu ge o ka dira bjalo.

 Tšea ka mohlala Calvin, yo a dumelago gore o ile a thoma go ba le mokgwa wa go bogela diswantšho tše ge a be a na le mengwaga e ka bago e 13. Calvin o re: “Ke be ke tseba gore mokgwa wo o fošagetše, eupša ke ile ka palelwa ke go fenya teko ye ya go di bogela. Le gona, ka morago ga go dira bjalo, ke be ke ikwa ke lewa ke dihlong. Tate o ile a lemoga seo, go bolela therešo ke ile ka ikwa ke imologile kudu! Mafelelong, ke ile ka kgona go hwetša thušo yeo ke bego ke e hloka.”

 Calvin o ile a ithuta go phema diswantšho tše. O re: “Ke ile ka dira phošo e kgolo ya go bogela diswantšho tše yeo ke sa dutšego ke lebeletšane le ditlamorago tša yona moo e lego gore diswantšho tše di sa dutše di tšwelela monaganong wa ka. Le gona ka dinako tše dingwe ke sa dutše ke lekega go nagana ka seo nka se bonago ge e ba ke bogela dilo tšeo ke sa swanelago go di bogela. Eupša ka nako ye ke nagana kamoo ke thabilego, ke hlwekilego le kamoo bokamoso bja ka bo kgahlišago ka gona ge ke dira dilo ka tsela ya Jehofa.”