BAFSA BA A BOTŠIŠA
Tlholo Goba Tlhagelelo?—Karolo 2: Ke ka Baka La’ng re Swanetše go Belaela Tlhagelelo?
Alex o kgakanegong. Ka mehla o be a dutše a dumela go Modimo le go tlholo. Eupša lehono morutiši wa gagwe wa thutaphedi o ile a gapeletša gore taba ya tlhagelelo ke ya therešo, le gore e theilwe nyakišišong yeo e makatšago ya tša thutamahlale. Alex ga a nyake go fetoga lešilo. O phetha ka go ipotšiša gore, ‘ge e ba thutamahlale e kgonthišeditše gore taba ya tlhagelelo ke ya therešo, ke nna mang gore nka e ngangiša?’
Na o kile wa ba boemong bjo swanago? Mohlomongwe bophelong bja gago ka moka , o be o dumela seo Beibele e se bolelago ge e re: “Modimo o hlodile magodimo le lefase.” (Genesi 1:1) Lega go le bjalo, morago bjale batho ba leka go go kgodiša gore tlholo ga se taba ya therešo le gore taba ya tlhagelelo ke ya therešo. Na o swanetše go ba dumela? Ke ka baka la’ng re swanetše go belaela tlhagelelo?
Mabaka a mabedi a go belaela tlhagelelo
Borathutamahlale ba na le dipono tše fapanego mabapi le tlhagelelo. Go sa šetšwe nywagasome yeo e fedilego go dirwa nyakišišo,borathutamahlale ba sa dutše ba hloka kwešišo ya tlhagelelo yeo ka moka ba tla dumelelanago le yona.
Seo o ka naganišišago ka sona: ge eba borathutamahlale ba sa dumelelane ka taba ya tlhagelelo—mola e le tšona ditsebi—na e ka ba phošo go belaela thuto e bjalo?—Psalme 10:4.
Seo o se dumelago ke sa bohlokwa. Mošemane yo a bitšwa Zachary o re: “Ge e ba bophelo bo tšweletše e le kotsi, gona maphelo a rena—le tšohle tše di lego legohleng—ga di na mohola.” O rerešitše, ge e ba tlhagelelo e be e le ya therešo, bophelo bo be bo ka se be le morero wa ka mo go sa felego. (1 Bakorinthe 15:32 ) Ka lehlakoreng le lengwe, ge e ba tlholo e le ya therešo, re ka hwetša dikarabo tše kgotsofatšago tša dipotšišo mabapi le morero wa bophelo le seo bokamoso bo se huperego—Jeremia 29:11.
Seo o ka naganišišago ka sona: ke bjang go tseba therešo mabapi le tlholo le tlhagelelo go ka dirago phapano bophelong bja gago?—Baheberu 11:1.
Dipotšišo tšeo re ka naganago ka tšona
SEO SE BOLELWAGO: ‘Se sengwe le se sengwe mo legohleng se bile gona ka baka la mothuthupo o mogolo.’
Ke mang goba ke eng yeo e bakilego mothuthupo o mogolo?
Ke eng seo se kwagalago gakaone—gore dilo ka moka di fo ba gona goba gore dilo di dirilwe ke motho goba selo se sengwe?
SEO SE BOLELWAGO: ‘Batho ba tšwa diphoofolong.’
Ge e le gore batho ba tšwa diphoofolong—ka mohlala ge eba ba tšwa ditšhweneng—ke ka baka la’ng go na le phapano e kgolo ya bohlale le tsela ya go nagana magareng ga batho le ditšhwene tšeo? a
Ke ka baka la’ng le dilo tše bonolo kudu bophelong di raragane ka tsela e makatšago? b
SEO SE BOLELWAGO: ‘Tlhagelelo ke taba yeo e kgonthišeditšwego.’
Na motho yo a bolelago taba ye o nyakišišitše bohlatse bjo ka nnoši?
Ke batho ba bakae bao ba dumelago go thuto ya tlhagelelo e le ge ba boditšwe gore batho ka moka ba bohlale ba dumela go yona?
a Ba bangwe ba ka bolela gore batho ba hlalefile kudu ka ge ba na le bjoko bjo bogolo go feta bja ditšhwene. Lega go le bjalo, go hwetša mabaka a bontšhago gore taba ye ga e na mothopo, bona poroutšha ya The Origin of Life—Five Questions Worth Asking, letlakala 28.
b Bona poroutšha ya The Origin of Life—Five Questions Worth Asking, matlakala 8-12.
You May Also Like
MATLAKALA A GO ITEKOLA A BAFSA
Ke ka Baka La’ng ke Dumela Gore Modimo o Gona?
Itokišetše go hlalosa ditumelo tša gago ka tlhompho, ntle le go ikwa o tšhogile goba go ipea molato ka seo o se dumelago.
BAFSA BA A BOTŠIŠA
Tlholo le Tlhagelelo—Karolo ya Pele: Ke ka Baka La’ng Ke Dumela Gore Modimo o Gona?
Na o ka rata go ba le kgodišego ge o hlalosa mabaka ao a dirago gore o dumele gore Modimo o gona? Hwetša ditemošo tšeo di ka go thušago go araba motho yoo a belaelago tumelo ya gago.
BAFSA BA A BOTŠIŠA
Tlholo Goba Tlhagelelo?—Karolo 3: Ke ka Baka La’ng ke Swanetše go Dumela Tlholo?
Na o swanetše go ba moila thutamahlale gore o dumele tlholo?
BAFSA BA A BOTŠIŠA
Tlholo Goba Tlhagelelo?—Karolo 4: Nka Hlalosa Bjang Tumelo ya ka ka Tlholo?
Ga go hlokege gore o be bohlale kudu le go tseba thutamahlale gore o kgone go hlalosa ka mo go kwagalago gore dilo ka moka di bopilwe. Diriša feela tlhaloso e bonolo e hwetšwago Beibeleng.
