Modimo ga se yena a dirago gore go be le dikotsi tša tlhago, ke kamoo a tshwenyegilego ka batho bao ba wetšwego ke dikotsi tše. Dikotsi tša tlhago ke e nngwe ya dilo tšeo Mmušo wa Modimo o tlago go di fediša. Eupša le ge gona bjale batho ba welwa ke dikotsi tša tlhago, Modimo o a ba homotša.​—2 Bakorinthe 1:3.

•  Re tseba bjang gore Modimo ga a diriše dikotsi tša tlhago go re otla?

•  Na dikotsi tša tlhago di bontšha gore re phela mehleng ya bofelo?

•  Modimo o thuša batho bao ba wetšwego ke dikotsi tša tlhago bjang?

•  Na Beibele e ka re thuša gore re itokišetše dikotsi tša tlhago?

•  Mangwalo a Beibele ao a ka homotšago batho bao ba wetšwego ke dikotsi tša tlhago

 Dikotsi tša tlhago di fapana le matla a Modimo ao a bego a a diriša go dira dilo tše itšego, tšeo go bolelwago ka tšona ka Beibeleng.

•   Dikotsi tša tlhago di bolaya batho e bile di a ba golofatša. Eupša matla a Modimo ao a bego a a šomiša go ahlola batho, o be a a dirišetša go fediša batho ba babe feela. Ka mohlala, ge a be a fediša batho ba babe bao ba bego ba dula metseng ya Sodoma le Gomora, o ile a kgonthišetša gore o phološa Lota monna wa go loka le barwedi ba gagwe ba babedi. (Genesi 19:29, 30) Modimo o kgona go bona dipelo tša baloki, ke kamoo mehleng ya kgale a be a kgonthišetša gore o fediša batho ba babe feela.​—Genesi 18:23-​32; 1 Samuele 16:7.

•   Gantši dikotsi tša tlhago ge di etla ga di laele. Eupša pele Modimo a ka diriša matla a gagwe gore a fediše batho ba babe, o be a thoma ka go ba lemoša. Ke moka batho bao ba bego ba theetša temošo yeo, ba be ba kgona go phološa maphelo a bona.​—Genesi 7:​1-5; Mateo 24:38, 39.

•   Dikotsi tša tlhago di baka ke batho e bile ba dirile gore tše dingwe di mpefale le go feta. Ba dira seo bjang? Ba dira seo ka go senya lefase le ka go aga meago kgauswi le mafelo ao gantši go bago le tšhišinyego ya lefase, mafula le boemo bja leratadima bjoo bo mpefetšego le go feta. (Kutollo 11:18) Eupša ga se ra swanela go bea Modimo molato ge dilo tše di direga.​—Diema 19:3.

 Ee, Beibele e bontšha gore “bofelo bja tshepedišo ya dilo,” goba “mehleng ya bofelo,” go tlaba le dikotsi tša tlhago. (Mateo 24:3; 2 Timotheo 3:1) Ka mohlala, ge Jesu a be a bolela ka dilo tšeo di tlago go direga mehla ya rena, o itše: “Go tla ba le tlhaelelo ya dijo le ditšhišinyego tša lefase lefelong le lengwe ka morago ga le lengwe.” (Mateo 24:7) Go se go ye kae, Modimo o tla fediša dilo ka moka tšeo di re bakelago bohloko, ditlaišego le dikotsi tša tlhago.​—Kutollo 21:​3, 4.

•   Modimo o diriša Beibele go homotša bao ba amilwego ke dikotsi tša tlhago. Beibele e kgonthišetša bao ba amilwego ke dikotsi tša tlhago gore Modimo o na le taba le bona e bile o a ba kwešiša. (Jesaya 63:9; 1 Petro 5:​6, 7) E bile e re botša ka dilo tšeo a tshepišago go tlo re direla tšona ge go tla be go se sa na dikotsi tša tlhago.​—Bala lepokisi leo le rego, “ Mangwalo a Beibele ao a ka homotšago batho bao ba wetšwego ke dikotsi tša tlhago.”

•   Modimo o diriša bahlanka ba gagwe go thuša batho bao ba wetšwego ke dikotsi tša tlhago. Modimo o diriša bahlanka ba gagwe mo lefaseng gore ba ekiše mohlala wa Jesu. Beibele e boletše e sa le pele gore Jesu o be a tlo homotša batho bao ‘dipelo tša bona di kwelego bohloko’ le “bohle bao ba llago.” (Jesaya 61:​1, 2) Bahlanka ba Jehofa ba leka ka thata gore le bona ba dire se se swanago.​—Johane 13:15.

   Modimo o diriša bahlanka ba gagwe gore ba thuše batho bao ba amilwego ke dikotsi tša tlhago.​—Ditiro 11:28-30; Bagalatia 6:​10.

 Ee. Le ge Beibele e sa re botše ka go lebanya gore re dire eng ge re wetšwe ke dikotsi tša tlhago, eupša e na le melao ya motheo yeo e ka re thušago. Ka mohlala:

•   Nagana ka seo o tlago go se dira ge go ka ba le kotsi ya tlhago. Beibele e re: “Yo bohlale ke yo a bonego kotsi a ikuta”. (Diema 22:3) E ka ba mo go botse go tseba e sa le pele gore o tlo dira’ng ge go ka ba le kotsi ya tlhago. Ka mohlala, o ka rulaganya mokotlana wa dilo tša thušo ya pele (emergency kit) woo o nago le dilo tšeo o tlago go di hlokago nakong ya kotsi ya tlhago, le go boledišana bjalo ka lelapa gore ge go ka ba le kotsi ya tlhago le tlo kopana kae.

•   Dira gore bophelo bo tle pele, e sego dilo tšeo o nago le tšona. Beibele e re: “Ga se ra tliša selo lefaseng, le gona re ka se ke ra tloga le selo.” (1 Timotheo 6:​7, 8) Re swanetše go leka ka thata gore re tlogele magae a rena le mahumo a rena gore re kgone go phologa dikotsi tša tlhago. Le gona, re swanetše go gopola gore bophelo bja rena bo bohlokwa go feta dilo tše re nago le tšona.​—Mateo 6:​25.