Beibele ga e bolele ka go lebanya ka diswantšho tša batho bao ba sa aparago, go boledišana ka thobalano Inthaneteng goba dilo tše di swanago le tšeo. Lega go le bjalo, e hlalosa ka mo go kwagalago kamoo Modimo a ikwago ka gona ka ditiro tšeo di kgothaletšago thobalano ya batho bao ba sa nyalanago goba pono e fošagetšego ka thobalano. Ela hloko ditemana tše tša Beibele:

•   “Ka gona bolayang mekgwa ya lefase yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi.” (Bakolose 3:5) Go bogela diswantšho tša batho bao ba sa aparago ga go bolaye dikganyogo tše di fošagetšego, eupša go a di gakatša. Go dira gore motho a se ke a hlweka goba a šilafale mahlong a Modimo.

•   “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” (Mateo 5:28) Diswantšho tša mekgwa e gobogilego ya thobalano di bjala dikgopolo tše di fošagetšego tšeo di lebišago ditirong tše di fošagetšego.

•   “Anke bootswa le ditšhila tša mohuta o mongwe le o mongwe goba megabaru le go bolelwa di se ke tša bolelwa gare ga lena.” (Baefeso 5:3) Ga se ra swanela go ithabiša ka go bolela ka thobalano e gobogilego, ga re sa bolela ka go e bogela goba go bala ka yona.

•   “Mediro ya nama e pepeneneng, yona ke bootswa, go se hlweke, . . . le dilo tša go swana le tše. Ke le lemoša e sa le pele ka dilo tše, go etša ge ke ile ka le lemoša e sa le pele, gore bao ba tlwaelago go dira dilo tše bjalo ba ka se je bohwa bja Mmušo wa Modimo.” (Bagalatia 5:19-21) Modimo o lebelela bao ba bogelago diswantšho tša batho bao ba sa aparago goba go boledišana ka thobalano Inthaneteng le founong goba go romelana melaetša ya thobalano e le go se hlweke, e lego go šilafala boitshwarong. Ge e ba re ka itlwaetša go dira dilo tše bjalo, re ka se amogelwe ke Modimo.