Ga go na moo Beibele e bolelago ka go lebanya ka di-dinosaur. Go e na le moo, Beibele e bolela gore Modimo o “bopile dilo ka moka.” Ka gona se se hlatsela gore di-dinosaur le tšona di bopilwe ke Modimo. a (Kutollo 4:​11) Go e na le gore Beibele e bolele ka go lebanya ka di-dinosaur, e bolela ka dibopiwa tšeo di-dinosaur di ka akaretšwago go tšona:

•   “Diphedi tše dikgolokgolo tša ka lewatleng,” goba “diphedi tšeo di tšhošago.”​—Genesi 1:​21; New American Bible.

•   “segagabi se sengwe le se sengwe.”—Genesi 1:​25.

•   “Diphoofolo tša naga.”—Genesi 1:​25.

Na di-dinosaur di tšwa diphoofolong tše dingwe?

 Bohlatse bjoo bo lego gona bo bontšha gore di-dinosaur di ile tša tšwelela gateetee, e sego gore di ile tša tšwelela ganyenyane-ganyenyane go tšwa diphoofolong tše dingwe. Se se dumelelana le dipego tša Beibele tšeo di bontšhago gore Modimo o bopile diphoofolo ka moka. Ka mohlala, Psalme 146:6 e hlalosa Modimo e le “Yena Modiri wa legodimo le lefase, lewatle le tšohle tše di lego go tšona.”

Di-dinosaur di phetše nako e kaakaa’ng mo lefaseng?

 Beibele e bontšha gore diphedi tša ka lewatleng le diphoofolo tša naga di bopilwe ka letšatši la bohlano le la botshelela la tlholo. b (Genesi 1:​20-​25, 31) Ka baka leo, Beibele e dumelelana le taba ya gore di-dinosaur di ile tša ba gona lefaseng ka nako e teletšana.

Na Behemothe le Lebiathane e be e le di-dinosaur?

 Aowa. Le ge re ka se kgonthišege ka mo go feletšego gore diphoofolo tšeo go bolelwago ka tšona ka pukung ya Jobo ke dife, gantši ge go bolelwa ka Behemothe go bolelwa ka kubu gomme ge go bolelwa ka Lebiathane go bolelwa ka kwena. Maina a, kubu le kwena, a dumelelana le tsela yeo diphoofolo tše di hlalositšwego ka yona ka Beibeleng. (Jobo 40:15-​23; 41:​1, 14-​17, 31) Ntle le moo, Behemothe le Lebiathane di ka se šupe go di-dinosaur. Modimo o ile a botša Jobo gore a ele hloko diphoofolo tše, le gona nakong ya ge Jobo a be a phela, di-dinousar e be e le kgale di se sa le gona.​—Jobo 40:16; 41:8.

Go diragetše eng ka di-dinosaur?

 Beibele ga e re botše gore go diragetše eng ka di-dinosaur. Go e na le moo, e re botša gore dilo ka moka di bopilwe ‘ka baka la thato ya Modimo.’ Ka gona Modimo o be a na le lebaka la go bopa di-dinosaur. (Kutollo 4:​11) Ge morero wa gagwe o phethagetše, Modimo o ile a dumelela gore di-dinosaur di se sa ba gona.