Beibele ga e bolele ka go lebanya ka “dibe tše šupago tše di bakago lehu.” Lega go le bjalo, e ruta gore ge motho a tlwaela go dira dibe tše dikgolo, a ka se phologe. Ka mohlala, Beibele e bolela ka dibe tše dikgolo tše bjalo ka boitshwaro bjo bo gobogilego bja thobalano, go rapela medimo ya diswantšho, go dirišana le meoya e mebe, go tlalelana ka bogale le botagwa e le “mediro ya nama.” E bolela gape gore: “Bao ba tlwaelago go dira dilo tše bjalo ba ka se je bohwa bja Mmušo wa Modimo.”​—Bagalatia 5:19-21. a

Na Beibele ga e bolele ka ‘dilo tše šupago tšeo di hlaswago ke Morena’?

 Ee, e bolela ka tšona. Go ya ka Beibele ya Sepedi, Diema 6:16 e re: “Xo na le dilô tše thsêlêla tše Morêna a di hloilexo; ké tše di šupaxo tše a di hlaswaxo.” Lega go le bjalo, lelokelelo la dibe tšeo di lego go Diema 6:17-19 ga se la felela. Go e na le moo, e hlalosa dilo tša motheo tšeo di emelago mehuta ka moka ya ditiro tše mpe, go akaretša dilo tšeo re di naganago, tšeo re di bolelago le tšeo re di dirago. b

Polelwana e rego “sebe se segolo” e ra gore’ng?

 Diphetolelo tše dingwe di šomiša polelwana ye go 1 Johane 5:16. Ka mohlala, Beibele ya Sepedi e balega ka gore: “Xo na le sebe se se išaxo lehung.” Polelwana e rego “sebe se se išaxo lehung” e ka fetolelwa gape e le “sebe se se bakago lehu.” Phapano ke efe magareng ga “sebe se se bakago lehu” le “sebe se se sa bakego lehu.”​—1 Johane 5:16.

 Beibele e bolela ka go lebanya gore dibe ka moka di lebiša lehung. Lega go le bjalo, re ka phološwa sebeng le lehung ka sehlabelo sa topollo sa Jesu Kriste. (Baroma 5:12; 6:23) Ka gona, “sebe se se bakago lehu” ga se akaretšwe go tšeo di ka lebalelwago ka topollo ya Kriste. Motho yo a dirago sebe sa mohuta woo, o ba a ikemišeditše go se nyake go fetoša pono goba mekgwa ya gagwe. Le gona Beibele e re sebe se bjalo se “ka se lebalelwe.”​—Mateo 12:31; Luka 12:10.